ഗാന്ധിനഗര്‍(കോട്ടയം): കേരള സര്‍ക്കാറിന്റെ വിന്‍വിന്‍ ലോട്ടറിയുടെ ഒന്നാം സമ്മാനം 75 ലക്ഷം തട്ടുകടക്കാരനു ലഭിച്ചു. മെഡിക്കല്‍ കോളജിനു സമീപം കേരള ഹോട്ടലിനു മുന്‍വശത്ത് തട്ടുകട നടത്തുന്ന മല്ലപ്പള്ളി വായ്‌പൂര് കൊറ്റമല മേല്‍പ്പുറത്ത് ബാബു (56) നെയാണ് ഭാഗ്യദേവത അനുഗ്രഹിച്ചത്. Â
നിരന്തരം ലോട്ടറി ടിക്കറ്റ് എടുക്കാറുണ്ടായിരുന്നു ബാബു. പലപ്പേഴും ചെറിയ സമ്മാനങ്ങളും നേടിയിട്ടുണ്ട്. ഇത്തവണയും നറുക്കെടുപ്പു ഫലം വന്നപ്പോള്‍ ചെറിയ സമ്മാനം എന്തെങ്കിലും കിട്ടിയോ എന്നു പരിശോധിച്ചെങ്കിലും ഒന്നും ഇല്ലാതിരുന്നതിനാല്‍ ടിക്കറ്റ് ഒഴിഞ്ഞ പ്ലാസ്റ്റിക്ക് കൂടിനുള്ളില്‍ നിക്ഷേപിച്ചു. തുടര്‍ന്ന് മറ്റൊരു സീരിയലില്‍ ഇതേ നമ്പര്‍ ഉണ്ടായിരുന്നയാള്‍ വന്നു സമ്മാനം ഉണ്ടെന്നറിയിച്ചപ്പോഴാണ് ഉപേക്ഷിച്ച ടിക്കറ്റ് വീണ്ടും എടുത്തു നോക്കിയത്. സമ്മാനം ലഭിച്ച ടിക്കറ്റ് മുടിയൂര്‍ക്കര കേരള ബാങ്കില്‍ ഏല്പിച്ചു. ഭാര്യയുമായി പിണങ്ങിക്കഴിയുകയാണ് ബാബു. സ്വന്തമായി വീടോ സ്ഥലമോ ഇല്ല. ഏറെ നാളുകളായി മെഡിക്കല്‍ കോളേജ് പരിസരത്താണ് ഇദ്ദേഹം കഴിയുന്നത്. ഭാവി കാര്യങ്ങള്‍ തീരുമാനിച്ചിട്ടില്ലെന്നും തട്ടുകട തുടരുമെന്നും ബാബു പറയുന്നു.
Â
