മുംബൈ: പള്ളികളിലെ ലൗഡ് സ്പീക്കറില് തൊട്ടാല് തിരിച്ചടിക്കുമെന്ന് മഹാരാഷ്ട്ര നവനിര്മ്മാണ് സേന നേതാവ് രാജ് താക്കറെയെ വെല്ലുവിളിച്ച പോപ്പുലര് ഫ്രണ്ട് നേതാവ് ഒളിവില് പോയി. മംബ്രയിലെ പോപ്പുലര് ഫ്രണ്ട് പ്രസിഡന്റ് അബ്ദുള് മട്ടീന് ഷെഖാനിയാണ് രാജ് താക്കറെയെ വെല്ലുവിളിച്ചത്.
ഷെഖാനിക്കെതിരെ നേരത്തെ മുംബൈ പൊലീസ് കേസെടുത്തിരുന്നു. ഇപ്പോള് രണ്ട് പൊലീസ് സംഘങ്ങള് വേര്തിരിഞ്ഞ് ഷെഖാനിക്ക് വേണ്ടിയുള്ള തിരച്ചില് തുടരുകയാണ്. അറസ്റ്റ് ചെയ്തേക്കുമെന്ന ഭയമാണ് ഷെഖാനിയെ ഒളിവില് പോകാന് പ്രേരിപ്പിച്ചതെന്ന് പറയുന്നു.
പള്ളികളിലെ ലൗഡ്സ്പീക്കറുകള് മെയ് മൂന്നിനകം നീക്കം ചെയ്യണമെന്ന് രാജ് താക്കറെ വെല്ലുവിളിച്ചിരുന്നു. അതിനകം ലൗഡ് സ്പീക്കറുകള് മാറ്റിയില്ലെങ്കില് പള്ളികള്ക്ക് മുന്നില് ഹനുമാന് ചാലിസ ഉറക്കെ മുഴക്കുമെന്നും രാജ്താക്കറെ വെല്ലുവിളിച്ചിരുന്നു. ഇതിന് മറുപടിയായാണ് പോപ്പുലര് ഫ്രണ്ടിന്റെ ഷെഖാനി വെറിപ്രസംഗം നടത്തിയത്. ലൗഡ് സ്പീക്കര് തൊട്ടവരെ പോപ്പുലര് ഫ്രണ്ട് വെറുതെ വിടില്ലെന്നായിരുന്നു ഷെഖാനിയുടെ താക്കീത്.
എന്നാല് വൈകാതെ ഷെഖാനിക്കെതിരെ ഇന്ത്യന് ശിക്ഷാനിയമത്തിലെ 188, 37(3), അനധികൃതമായി സംഘം ചേര്ന്നതിന് മഹാരാഷ്ട്ര പൊലീസ് നിയമത്തിലെ 135 എന്നീ വകുപ്പുകള് പ്രകാരം കേസെടുത്തിരുന്നു.
ഷെഖാനിയുടെ വെല്ലുവിളിക്ക് ശേഷവും രാജ് താക്കറെ മെയ് 3ന് ലൗഡ് സ്പീക്കറുകള് പള്ളികളില് നിന്നും നീക്കണമെന്ന വെല്ലുവിളി ആവര്ത്തിച്ചിരുന്നു. ഇത് മതപ്രശ്നമല്ല, സാമൂഹ്യപ്രശ്നമാണെന്നും രാജ് താക്കറെ പറഞ്ഞിരുന്നു. ലൗഡ് സ്പീക്കറിന്റെ കാര്യത്തില് പുറകോട്ട് പോകുന്ന പ്രശ്നമില്ലെന്നും രാജ് താക്കറെ ആവര്ത്തിച്ചു.
‘ഞാന് പ്രാര്ത്ഥിക്കുന്നതിന് എതിരല്ല. പക്ഷെ ലൗഡ് സ്പീക്കറുകള് പള്ളികളില് നിന്നും നീക്കം ചെയ്യുന്നത് സംബന്ധിച്ച് സര്ക്കാര് ഒരു തീരുമാനമെടുക്കണം. ലൗഡ് സ്പീക്കറുകള് പള്ളികളില് നിന്നും നീക്കം ചെയ്യണം. അല്ലെങ്കില് ലൗഡ് സ്പീക്കറുകളുള്ള പള്ളികളുടെ മുന്പില് ഹനുമാന് ചാലിസ ഉച്ചത്തില് കേള്പ്പിക്കും’- രാജ് താക്കറെ പറഞ്ഞു.
