തിരുവനന്തപുരം: തെലുങ്ക് സൂപ്പര്‍താരം രാം ചരണ്‍ നായകനായ രാജമൗലി ചിത്രം ആര്‍ആര്‍ആറിന്റെ വന്‍വിജയം അയ്യപ്പസ്വാമിക്ക് സമര്‍പ്പിക്കാന്‍ നടന്‍ സന്നിധാനത്ത് എത്തുന്നു. ദിവസങ്ങളായി കറുപ്പുടുത്ത് ചെരുപ്പ് ധരിക്കാതെയാണ് രാം ചരണന്റെ യാത്രയും പരിപാടികളും. വിഷു ദിനത്തില്‍ സന്നിധാനത്തത്തെത്തി രാം ചരണ്‍ ദര്‍ശനം നടത്തുമെന്ന് ദേവസ്വം ബോര്‍ഡിന് അറിയിപ്പ് ലഭിച്ചിട്ടുണ്ട്. തെലുങ്ക് സിനിമയിലെ സൂപ്പര്‍താരമായ ചിരഞ്ജിവി കുറച്ചു നാള്‍ മുമ്പ് ശബരിമലയില്‍ എത്തിയിരുന്നു. മകന്റെ സിനിമയുടെ വിജയത്തിനായി പ്രാര്‍ത്ഥിക്കാനായിരുന്നു അദ്ദേഹം എത്തിയത്. ചിരഞ്ജീവിയും മകനും കടുത്ത അയപ്പ ഭക്തരാണ്. ആര്‍ആര്‍ആറിന്റെ വന്‍വിജയത്തിനു ശേഷം അയ്യപ്പദര്‍ശനം നടത്താമെന്ന് രാം ചരണ്‍ നേര്‍ച്ചയും നേര്‍ന്നിരുന്നു.
. ആര്‍ ആര്‍ ആര്‍ റിലീസിന് ശേഷം മകന്‍ ശബരിമലയില്‍ വരുമെന്ന് അധികൃതരെ അറിയിച്ചാണ് ചിരഞ്ജീവി ശബരിമല ദര്‍ശനത്തിന് ശേഷം എത്തിയത്. അന്ന് ചിരഞ്ജീവിക്കൊപ്പമുണ്ടായിരുന്ന സ്ത്രീയുടെ പ്രായത്തെ കുറിച്ച് വിവാദമുണ്ടായി. എന്നാല്‍ ആചാരാനുഷ്ഠാനങ്ങള്‍ പാലിച്ചായിരുന്നു ചിരഞ്ജീവിയും സംഘവും എത്തിയതെന്ന് പിന്നീട് വ്യക്തമായി. അച്ഛനെ പോലെ വ്രതം നോറ്റു തന്നെയാണ് മകനും സന്നിധാനത്തേക്ക് എത്തുന്നത്.ഇതിന്റെ ഭാഗമായിട്ടാണ് കറുപ്പുടുത്തതും ചെരിപ്പ് ഉപേക്ഷിച്ചതും. എല്ലാ വര്‍ഷവും വ്രതം അനുഷ്ഠിക്കാറുണ്ട് രാംചരണ്‍. രാം ചരണും പിതാവും നടനുമായ ചിരഞ്ജീവിയും വര്‍ഷങ്ങളായി ശബരിമലയില്‍ ദര്‍ശനം നടത്താറുണ്ട്. അതേസമയം, ഇതേദിവസം അല്ലു അര്‍ജുനും സന്നിധാനത്ത് എത്തുമെന്ന് റിപ്പോര്‍ട്ടുണ്ട്.
