ന്യദല്ഹി: സാമ്പത്തിക, ഊര്ജ്ജപ്രതിസന്ധികളില് നട്ടം തിരിയുന്ന ശ്രീലങ്കയിലേക്ക് സഹായഹസ്തവുമായി ഇന്ത്യ എത്തി. ഏകദേശം 40000 മെട്രിക് ടണ് ഡീസല് നിറച്ച് കപ്പലാണ് ഇന്ത്യയില് നിന്നും ശ്രീലങ്കയില് ശനിയാഴ്ച എത്തിച്ചേര്ന്നത്.
ശ്രീലങ്കയ്ക്ക് ഇന്ത്യ നല്കുന്ന 100 കോടി ഡോളര് ധനസഹായത്തിന്റെ ഭാഗമായാണ് ഡീസല് എത്തിച്ചത്. ശനിയാഴ്ച വൈകീട്ട് തന്നെ ശ്രീലങ്കയിലെ വിവിധ ഭാഗങ്ങളില് ഈ ഡീസല് വിതരണം ചെയ്യും. ഇന്ത്യന് ഓയില് കോര്പറേഷനാണ് ഈ സഹായം എത്തിക്കുന്നത്ശ്രീലങ്കയിലെ മിക്ക പമ്പുകളും ഡീസല്ക്ഷാമം മൂലം അടച്ചിട്ടിരിക്കുകയാണ്. ഇതോടെ ഓട്ടോ-ടാക്സികള് ബസുകള് എന്നിവ പോലും ഡീസല് ക്ഷാമം മൂലം നിരത്തിലിറങ്ങാന് കഴിയാത്ത സ്ഥിതിവിശേഷത്തിലാണ്. ഇന്ത്യയില് നിന്നെത്തിയ ഡീസല് അല്പ ദിവസങ്ങളിലേക്ക് ആശ്വാസമാകുമെന്ന് കരുതുന്നു.
ശ്രീലങ്കയില് വെള്ളിയാഴ്ച തന്നെ പ്രസിഡന്റ് ഗോതബായ രാജപക്സ അടിയന്തരാവസ്ഥ പ്രഖ്യാപിച്ചിരിക്കുകയാണ്. പ്രതിസന്ധിയില് നിന്നും കരകയറാന് പ്രതിപക്ഷപാര്ട്ടിയായ മൈത്രിപാല സിരിസേനയുടെ ഫ്രീഡം പാര്ട്ടിയും ഭരണപാര്ട്ടിയുമായി കൈകോര്ത്ത് പിടിക്കുകയാണ്. അവശ്യസാധനങ്ങള് ഇറക്കുമതി ചെയ്യാന് പോലും വിദേശനാണ്യശേഖരമില്ലെന്നതാണ് ശ്രീലങ്കയുടെ ഏറ്റവും വലിയ പ്രതിസന്ധി. ഇതില് നിന്നും കരകയറാന് ഐഎംഎഫ് പോലുള്ള സ്ഥാപനങ്ങള് സഹായിക്കേണ്ടി വരും എന്ന സ്ഥിതിവിശേഷമാണ്. ഇപ്പോള് ശ്രീലങ്കയിലെ നാണ്യപ്പെരുപ്പം 18.7 ശതമാനമാണ്. അതുകൊണ്ട് തന്നെ ഒരു കിലോ അരിയ്ക്ക് 200 ശ്രീലങ്കന് രൂപയാണെങ്കില് ഒരു മുട്ടയ്ക്ക് 35 ശ്രീലങ്കന് രൂപയാണ്. അവശ്യസാധനങ്ങളുടെ വിലക്കയറ്റത്തില് പൊറുതിമുട്ടിയ ജനം പ്രക്ഷോഭവുമായി വെള്ളിയാഴ്ച രാത്രി തെരുവിലിറങ്ങിയിരുന്നു. എന്നാല് പൊലീസ് ഈ പ്രക്ഷോഭം അടിച്ചമര്ത്തി. ശ്രീലങ്കയുടെ തലസ്ഥാനമായ കൊളംബോവില് ഉയര്ന്ന തോതിലുള്ള കര്ഫ്യൂ ഏര്പ്പെടുത്തിയിരിക്കുകയാണ്.
കോവിഡ് മഹാമാരിയെത്തുടര്ന്ന് ശ്രീലങ്കയുടെ പ്രധാനവരുമാനമാര്ഗ്ഗമായ ടൂറിസം തകര്ന്നു. പുറത്തുനിന്നുള്ള പണത്തിന്റെ ഒഴുക്കും കുറഞ്ഞു. കാര്ഷിക മേഖല ഒറ്റയടിക്ക് ജൈവകൃഷിയിലേക്ക് മാറിയതും തകര്ച്ചയ്ക്ക് കാരണമായി. അതോടൊപ്പം ഭരിയ്ക്കുന്നവരുടെ പിടിപ്പ് കേടും വര്ഷങ്ങളായുള്ള കടമെടുപ്പ് വര്ധിച്ചതും തകര്ച്ചയ്ക്ക് ആക്കം കൂട്ടി.
