ബെംഗളൂരു: കര്‍ണ്ണാടകയില്‍ ചില ഹൈന്ദവ ഗ്രൂപ്പുകളും ബിജെപി നേതാക്കളും ഉഗാദിക്ക് ഹലാല്‍ ഭക്ഷണം ബഹിഷ്‌കരിക്കാന്‍ ആഹ്വാനം ചെയ്തിരിക്കുകയാണ്. ഹിജാബ് വിവാദത്തിന്റെ പശ്ചാത്തലത്തിലാണ് ഈ ധ്രൂവീകരണ നീക്കം ശക്തമാകുന്നത്.
ഇതിനിടെ അമുസ്ലിങ്ങളെ ഹലാല്‍ ഭക്ഷണം കഴിപ്പിക്കുന്നത് ധര്‍മ്മ ഭ്രഷ്ടരാക്കുന്നതിന് തുല്ല്യമാണെന്ന് കര്‍ണ്ണാടക ബിജെപിയിലെ മുസ്ലിം നേതാവ് റഹിം ഉചില്‍ പറഞ്ഞു. ഉഡുപ്പി കോളെജുകളില്‍ സമരം ചെയ്യുന്ന മുസ്ലിം പെണ്‍കുട്ടികള്‍ക്കെതിരെ നിലപാടെടുത്തതിന്റെ പേരിലും റഹിം ഉചിലിന്റെ പേര് മാധ്യമശ്രദ്ധ നേടിയിരുന്നു.
‘ഹലാല്‍ മുസ്ലിങ്ങളുടെ അവിഭാജ്യഘടകമാണ്. കഴിഞ്ഞ 1400 വര്‍ഷങ്ങളായി അവര്‍ അത് ആചരിക്കുന്നു. പ്രാര്‍ത്ഥനകള്‍ക്ക് ശേഷം കൊല്ലുന്ന മൃഗത്തിന്റെ മാംസം ലോകമെങ്ങുമുള്ള മുസ്ലിങ്ങളള്‍ ഉപയോഗിക്കുന്നു. പക്ഷെ ഹലാലിനെക്കുറിച്ചുള്ള സത്യം മറച്ചുപിടിച്ച് അമുസ്ലിങ്ങളായവരെ ഹലാല്‍ ഭക്ഷണം കഴിപ്പിക്കുന്നത് ശരിയല്ല.’- കഴിഞ്ഞ ദിവസം റഹിം ഉചില്‍ ഡെക്കാന്‍ ഹെറാള്‍ഡ് പത്രത്തിനോട് പ്രതികരിച്ചതാണിത്.
ഹലാല്‍ എന്ന് അടയാളപ്പെടുത്താന്‍ എന്തൊക്കെയാണ് ചെയ്യുന്നതെന്ന് മുസ്ലിംസമുദായം അമുസ്ലിങ്ങളെ അറിയിക്കേണ്ടതുണ്ടെന്നും റഹിം ഉചില്‍ പറയുന്നു. ‘ഹലാല്‍ നടത്തുമ്പോള്‍ എന്തൊക്കെ വാക്കുകളാണ് പ്രാര്‍ത്ഥനയില്‍ ഉപയോഗിക്കുന്നത് എന്നതും അതിന്റെ അര്‍ത്ഥങ്ങളും അമുസ്ലിങ്ങളെ അറിയിക്കണം. അല്ലാതെ ഇതെല്ലാം മറച്ചുപിടിച്ച് ബിസിനസ് ചെയ്യുന്നത് ശരിയല്ല’- റഹിം ഉചില്‍ പറയുന്നു.
ഇതിനിടെ ബിജെപി ദേശീയ ജനറല്‍ സെക്രട്ടറി സി.ടി. രാവി ഉള്‍പ്പെടെ ഒട്ടേറെ നേതാക്കള്‍ ഹലാല്‍ ഭക്ഷണം ബഹിഷ്‌കരിക്കമമെന്ന് ആവശ്യപ്പെട്ട് രംഗത്തെത്തി. ഹൊസതൊഡ്കു ആഘോഷത്തിന് ഹലാല്‍ മാംസം ബഹിഷ്‌കരിക്കാന്‍ മൈസൂരിലെ മാണ്ഡ്യ പ്രദേശത്തെ ചില സംഘടനകള്‍ ആഹ്വാനം ചെയ്തു. ഉഗാദി ആഘോഷത്തിന്റെ ഭാഗമായുള്ള ഹൊസതൊഡ്കു ആഘോഷത്തിന് ദൈവങ്ങള്‍ക്ക് സമര്‍പ്പിക്കാന്‍ മാംസം പാകം ചെയ്യാറുണ്ട്. പക്ഷെ മുസ്ലിം വ്യാപാരികള്‍ അവരുടെ പ്രാര്‍ത്ഥന നടത്തിയ ശേഷമാണ് മുഗങ്ങളെ കൊല്ലുന്നതെന്നതിനാല്‍ ഇത് ഉപയോഗിക്കരുതെന്ന് ഹിന്ദു ജന ജാഗൃതി സമിതി വക്താവ് മോഹന്‍ ഗൗഡ പറഞ്ഞു. അതേ സമയം മുസ്ലിങ്ങള്‍ ഹലാല്‍ അല്ലാത്ത മാംസം വിറ്റാല്‍ ഉപയോഗിക്കുന്നതില്‍ വിരോധമില്ലെന്നും അദ്ദേഹം പറഞ്ഞു.
