മോസ്കോ : ഉക്രൈനെതിരായ യുദ്ധത്തിന്റെ ആദ്യഘട്ടം അവസാനിച്ചതായി റഷ്യന് പ്രഖ്യാപനം. ഉക്രൈനിന്റെ സൈനികശേഷി കുറയ്ക്കാന് റഷ്യയ്ക്കായി. കിഴക്കന് ഉക്രൈനില് ശ്രദ്ധ കേന്ദ്രീകരിക്കാനാണ് തീരുമാനം. ഉക്രൈന് വ്യോമസേനയേയും വ്യോമപ്രതിരോധ സേനയെയും തകര്ത്തുവെന്നും നാവിക സേനയെ ഇല്ലാതാക്കി. സാധാരണക്കാര്ക്ക് നേരെ ആക്രമണം നടത്തിയിട്ടില്ലെന്നും പരമാവധി നാശം ഒഴിവാക്കാനാണ് ശ്രമിച്ചതെന്നും റഷ്യന് പ്രതിരോധ മന്ത്രാലയം വ്യക്തമാക്കി.
ലുഹാന്സ്ക് ഡോണ്ബാസ് പ്രദേശത്തിന്റെ സമ്പൂര്ണ്ണ നിയന്ത്രണമാണ് റഷ്യന് ലക്ഷ്യം ലുഹാന് ഒബ്ലാസ്റ്റിന്റെ 93 ശതമാനം പ്രദേശവും ഇപ്പോള് റഷ്യന് പിന്തുണയുള്ള ഉക്രൈന് വിമതരുടെ നിയന്ത്രണത്തിലാണ്. ഡോണ്ബാസ്കിന്റെ 54 ശതമാനം പ്രദേശവും ഇവര് നിയന്ത്രണത്തിലാക്കിയിട്ടുണ്ട്. മരിയുപോളിനായുള്ള യുദ്ധം തുടരുകയാണ്. ക്രിമിയയില് നിന്ന് ഡോണ്ബാസ്ക് ലുഹാന്സ്ക് പ്രദേശങ്ങള് വരെയുള്ള കരപ്രദേശവും അസോവ് കടലും പൂര്ണ്ണമായി നിയന്ത്രണത്തിലാക്കുകയാണ് റഷ്യന് ലക്ഷ്യം.
ഉക്രൈനിലെ സൈനിക നടപടികളില് റഷ്യയ്ക്കുണ്ടായ ആള്നാശത്തെക്കുറിച്ചുള്ള കണക്കുകളും റഷ്യ പുറത്ത് വിട്ടിട്ടുണ്ട്. 1,351 സൈനികര് ഇത് വരെ കൊല്ലപ്പെട്ടുവെന്നും 3,825 പേര്ക്ക് പരിക്കേറ്റുവെന്നുമാണ് റഷ്യയുടെ ഔദ്യോഗിക കണക്ക്. പതിനാറായിരത്തിലധികം റഷ്യന് സൈനികര് യുദ്ധത്തില് കൊല്ലപ്പെട്ടുവെന്നായിരുന്നു ഉക്രൈന് അറിയിച്ചിരുന്നത്. എന്നാല് റഷ്യ യുദ്ധത്തിലുണ്ടായ ആള് നാശം ഒളിച്ചുവയ്ക്കുകയാണെന്നാണ് പാശ്ചാത്യ രാജ്യങ്ങളുടെ ആരോപിച്ചു.
അതേസമയം മെയ് ഒമ്പതിന് യുദ്ധം അവസാനിപ്പിക്കാനാണ് റഷ്യയുടെ രഹസ്യതീരുമാനമെന്ന് ഉക്രൈന് സൈന്യം ആരോപിച്ചു. റഷ്യ ഇനിയും നാശനഷ്ടം ഉണ്ടാക്കും. സ്വാധീനം ഉറപ്പിച്ച ശേഷം സൈനിക പിന്മാറ്റം ഓരോ മേഖലയിലും റഷ്യ നടത്തിക്കൊണ്ടിരിക്കുകയാണെന്നും ഉക്രൈന് വിമര്ശിച്ചു.
