ചെറുവത്തൂര്‍: ക്ഷേത്ര ദാരു ശില്‍പകലയില്‍ തന്റേതായ വ്യക്തി മുദ്ര പതിപ്പിക്കുകയാണ് മൈത്താണി സ്വദേശി മുരളി കൃഷ്ണന്‍. മുംബൈ, ല്‍ഹി തുടങ്ങിയ വന്‍ നഗരങ്ങളിലെ മുത്തപ്പന്‍ ക്ഷേത്രങ്ങളുടെ രൂപ നിര്‍മാണത്തിലും പെയിന്റിങ്ങിലും തന്റെതായ വ്യക്തി മുദ്ര പതിപ്പിച്ചിട്ടുണ്ട്. വിവിധ ക്ഷേത്രങ്ങളിലെ ഈ കലാകാരന്റെ ചുമര്‍ ചിത്രരചനയും ഏറെ ശ്രദ്ധേയമാണ്.
47കാരനായ മുരളി കൃഷ്ണന്‍ ഇതിനകം പൂര്‍ത്തിയാക്കിയത് 200ല്‍ പരം കിംപുരുഷന്‍ രൂപങ്ങള്‍. കണ്ണൂര്‍ ജില്ലയിലെ മാടായിയില്‍ ജനിച്ചു വളര്‍ന്ന മുരളീ രവിവര്‍മന്‍ 15 വര്‍ഷത്തോളമായി തൃക്കരിപ്പൂര്‍ നടക്കാവിലെ മൈത്താണിയിലാണ് താമസം. ചെറുപ്പം മുതല്‍ തന്നെ വര്‍ണ്ണങ്ങളോടും ക്ഷേത്രങ്ങളോടും പ്രത്യേകം താല്‍പര്യമുണ്ടായിരുന്നു.പ്രമുഖ ശില്‍പി കൊയോങ്കരയിലെ പരേതനായ കെ.പി.ചന്തുക്കുട്ടിയാണ് ക്ഷേത്ര ശില്‍പ കലയില്‍ ഏറെ പ്രോത്സാഹനം നല്‍കിയതെന്ന് മുരളി പറയുന്നു.
ഇനാമല്‍, അക്രലിക് പെയിന്റുകള്‍ ഉപയോഗിച്ചാണ് തേക്കില്‍ തടിയില്‍ മനോഹരരൂപം സൃഷ്ടിച്ചെടുക്കുന്നത്. ഒരാഴ്ച മുതല്‍ ഒരുമാസം വരെ മെനക്കെട്ടാണ് മരത്തില്‍ വര്‍ണങ്ങള്‍ ചാലിച്ചെടുക്കുന്നത്. പരിയാരത്തെ ബന്ധുവും കലാകാരനുമായ പവിത്രനാണ് മരത്തില്‍ ശില്‍പങ്ങള്‍ കൊത്തിയെടുക്കുന്നത്.
ഒന്‍പതാം വയസില്‍ കുടുംബാംഗങ്ങള്‍ക്കൊപ്പം ദാരുശില്‍പ നിര്‍മാണത്തില്‍ തുടക്കമിട്ട മുരളി ക്ഷേത്രശില്‍പ കലാ രംഗത്ത് 39 വര്‍ഷത്തിനിടയില്‍ മലബാറിലെ മിക്കക്ഷേത്രങ്ങളിലും തന്റെ കയ്യൊപ്പ് ചാര്‍ത്തിയിട്ടുണ്ട്. ചെറുതാഴം രാഘവപുരം ക്ഷേത്രം, ഒളവറ മുണ്ട്യക്കാവ്, മാടായി മുച്ചിലോട്ട് ക്ഷേത്രം, മാടായി കൂര്‍മ്പ ഭഗവതി ക്ഷേത്രം ഉള്‍പ്പെടെ 300 ലധികം ക്ഷേത്രങ്ങളില്‍ ശില്‍പ്പങ്ങളും ചിത്രങ്ങളുമൊരുക്കിയിട്ടുണ്ട്.
എട്ടുവര്‍ഷം മുമ്പ് ദാരുശില്‍പകലയിലെ മികവിന് തളിപ്പറമ്പ് മഴൂര്‍ ബാലഭദ്ര സ്വാമി ക്ഷേത്രത്തില്‍നിന്നും പട്ടുംവളയും നല്‍കി മുരളിയെ ആദരിച്ചിരുന്നു. ഭാര്യ പ്രീതയും മകള്‍ നന്ദനയും മുരളിയുടെ എല്ലാ രചനയ്‌ക്കും പിന്തുണയും പ്രോത്സാഹനവുമായി എന്നുമുണ്ട്.
