മലപ്പുറം: തളര്ന്ന് കിടക്കുന്ന അമ്മയ്ക്കരികില് വച്ച് മകളെ ക്രൂരമായി പീഡിപ്പിച്ച സംഭവത്തില് വ്യാപക പ്രതിഷേധം. കേരളമനസ്സാക്ഷിയെ നടുക്കുന്ന സംഭവം നടന്നിട്ട് ഒരു ദിവസം പിന്നിടുമ്പോഴും സര്ക്കാരും ബുദ്ധിജീവിനാട്യക്കാരും പുലര്ത്തുന്ന കുറ്റകരമായ മൗനത്തിനെതിരെ സമൂഹമാധ്യമങ്ങളിലും പ്രതിഷേധം കനക്കുകയാണ്.
മലപ്പുറം അരീക്കോട് കാവനൂരിലാണ് സംഭവം. മാനസിക വെല്ലുവിളി നേരിടുന്ന പെണ്കുട്ടിയെ മുട്ടാളന് ഷിഹാബ് എന്നറിയപ്പെടുന്ന ടി.വി. ഷിഹാബ് ആണ് പീഡിപ്പിച്ചത്. തുടര്ന്ന് പെണ്കുട്ടിക്ക് നേരെ വധഭീഷണിയും മുഴക്കി. പ്രതിയെ പോലീസ് അറസ്റ്റ് ചെയ്തു. എന്നാല് ജാമ്യം കിട്ടി പുറത്തിറങ്ങിയാല് ഇരയേയും സാക്ഷി പറഞ്ഞ അയല്ക്കാരനെയും വകവരുത്തുമെന്ന് പ്രതി ഭീഷണിമുഴക്കിയിരിക്കുകയാണ്.
പ്രാഥമിക കൃത്യങ്ങള്ക്ക് പോലും കട്ടിലില് നിന്ന് ഇറങ്ങാന് കഴിയാത്ത അമ്മയെ പരിചരിക്കുന്ന മാനസിക, ശാരീരിക വെല്ലുവിളികള് നേരിടുന്ന മകളെയാണ് കഴിഞ്ഞ ദിവസം അര്ദ്ധരാത്രി വാടക ക്വാര്ട്ടേഴ്സിന്റെ കതക് ചവിട്ടി തുറന്ന് അകത്ത് കയറിയ പ്രതി പീഡിപ്പിച്ചത്. തൊട്ടടുത്ത് വച്ച് മകളെ പീഡിപ്പിക്കുന്നത് അറിഞ്ഞിട്ടും തളര്ന്നു കിടക്കുന്ന അമ്മയ്ക്ക് കരയാന് മാത്രമേ കഴിഞ്ഞുള്ളൂ. അയല്ക്കാര് അറിയിച്ചതിനെ തുടര്ന്ന് പോലീസെത്തിയാണ് പ്രതിയെ അറസ്റ്റ് ചെയ്തത്.
ഷിഹാബിനെതിരെ ഒട്ടേറെ കേസുകള് വേറേയുമുണ്ട്. പോലീസ് ഇയാളെ കസ്റ്റഡിയില് എടുത്തതിന് പിന്നാലെ പരാതി അറിയിച്ച അയല്ക്കാരിയുടെ ഭര്ത്താവിനെ പ്രതിയുടെ ആളുകള് ഫോണില് വിളിച്ച് ഭീഷണിപ്പെടുത്തിയിരുന്നു. ഷിഹാബ് ജാമ്യത്തിലിറങ്ങിയാല് ജീവന് ഭീഷണിയാണെന്ന് നാട്ടുകാര് ഉള്പ്പെടെ പറയുന്നു. ഇരയ്ക്കും സാക്ഷിക്കും സംരക്ഷണം ഉറപ്പുവരുത്തണമെന്ന ആവശ്യവുമായി യുവമോര്ച്ച അടക്കമുള്ള സംഘടനകള് രംഗത്തെത്തിയിട്ടുണ്ട്.
