കോട്ടയം : മൂര്ഖന് പാമ്പിന്റെ കടിയേറ്റ് ചികിത്സയിലായിരുന്ന വാവ സുരേഷിന്റെ ശരീരത്തില് നിന്നും വിഷം പൂര്ണ്ണമായി മാറി ആരോഗ്യവാനായി. ഇത്രയും ദിവസം വെന്റിലേറ്ററില് കിടന്നതിന്റെയും മരുന്നുകളുടേയും ക്ഷീണം മാത്രമാണ് അദ്ദേഹത്തിന് ഇപ്പോഴുള്ളതെന്നും ആശുപത്രി വൃത്തങ്ങള് അറിയിച്ചു.
റൂമിലേക്ക് മാറ്റിയ വാവ സുരേഷിന് ഇപ്പോള് പാമ്പിന്റെ കടിയേറ്റുണ്ടായ മുറിവുണങ്ങാന് മാത്രമാണ് മരുന്ന് നല്കുന്നത്. വെള്ളിയാഴ്ചയും ഇന്ന് പുലര്ച്ചെയുമായി ഇദ്ദേഹം ഏഴുന്നേറ്റ് നടന്നു. സാധാരണഗതിയില് ഭക്ഷണം കഴിക്കുന്നതായും ആരോഗ്യവകുപ്പ് വ്യക്തമാക്കി.
കഴിഞ്ഞ ദിവസം നീലംപേരൂര് വെച്ചായിരുന്നു വാവ സുരേഷിനെ മൂര്ഖന് പാമ്പ് കടിച്ചത്. പിടികൂടിയ പാമ്പിനെ ചാക്കില് കയറ്റുന്നതിനിടെ തുടയില് കടിക്കുകയായിരുന്നു. തുടര്ന്ന് ഗുരുതരാവസ്ഥയിലായ സുരേഷിനെ ആദ്യം കോട്ടയത്തെ സ്വകാര്യ ആശുപത്രിയില് പ്രവേശിപ്പിച്ചു. ഹൃദയാഘാതം ഉണ്ടാവുകയും ആരോഗ്യനില വഷളാവുകയും ചെയ്തതോടെ കോട്ടയം മെഡിക്കല് കോളേജിലേക്ക് മാറ്റി. ന്യൂറോ, കാര്ഡിയാക് വിദഗ്ധര്മാര് അടങ്ങുന്ന ആറംഗ വിദഗ്ദ്ധ സംഘമാണ് വാവ സുരേഷിന്റെ ചികിത്സയ്ക്ക് മേല്നോട്ടം വഹിക്കുന്നത്.
