കണ്ണൂര് : ഇ ബുള് ജെറ്റ് വ്ളോഗര്മാരുടെ വാഹനമായ നെപ്പോളിയനില് വരുത്തിയ എല്ലാ അനധികൃത രൂപമാറ്റങ്ങളും നീക്കം ചെയ്യാന് കോടതി ഉത്തരവ്. വാഹനം ഉടമയുടെ സ്വന്തം ചെലവില് നിയമാനുസൃതമായ രീതിയില് തിരികെ കൊണ്ടുവന്ന് പോലീസ് സ്റ്റേഷനില് സൂക്ഷിക്കാനും അഡീഷണല് ചീഫ് ജുഡീഷ്യല് മജിസ്ട്രേറ്റ് കോടതി വ്യക്തമാക്കി. വാഹനം വിട്ടുകിട്ടണമെന്ന് ആവശ്യപ്പെട്ട് മോട്ടോര് വാഹന വകുപ്പിനെതിരെ എബിന് വര്ഗീസ് സമര്പ്പിച്ച ഹര്ജിയിലാണ് ഉത്തരവ്.
ആവശ്യത്തിനല്ലാതെ വാഹനം റോഡില് ഇറക്കരുത്. വാഹനം ഇ ബുള് ജെറ്റിന് വിട്ടു നല്കാന് സാധിക്കില്ല. ചട്ട വിരുദ്ധമായി വാഹനത്തിന് നിയമ വിരുദ്ധമായി കൊണ്ടുവന്ന മാറ്റങ്ങളെല്ലാം ഉടമയുടെ സ്വന്തം ചെലവില് തന്നെ തിരികെ കൊണ്ടുവരണം. 12 ലക്ഷം രൂപയ്ക്ക് തുല്യമായ ബോണ്ടും സമര്പ്പിക്കാനും കോടതി ആശ്യപ്പെട്ടിട്ടുണ്ട്. ഇത് കൂടാതെ ആറ് മാസത്തേയ്ക്ക് താത്കാലികമായി റദ്ദാക്കിയ രജിസ്ട്രേഷന് സ്ഥിരമായി നഷ്ടമാകാതിരിക്കാന് നടപടിക്രമങ്ങള് പാലിക്കണമെന്നും ഉത്തരവ് വ്യക്തമാക്കുന്നു.
നിയമവിരുദ്ധമായി രൂപമാറ്റം വരുത്തി നിരത്തില് ഇറക്കിയതില് ഇ ബുള് ജെറ്റ് വ്ളോഗേഴ്സിന്റെ വാഹനത്തിന്റെ രജിസ്ട്രേഷന് മോട്ടോര് വാഹന വകുപ്പ് നേരത്തെ തന്നെ റദ്ദാക്കിയിട്ടുണ്ട്. വിഷയത്തില് വ്ളോഗര് സഹോദരന്മാരായ എബിനും ലിബിനും മോട്ടോര് വാഹന വകുപ്പ് കാരണം കാണിക്കല് നോട്ടീസും നല്കിയിരുന്നു. ഇരുവരും നല്കിയ മറുപടി തൃപ്തികരമല്ലാത്തതിനെ തുടര്ന്നാണ് രജിസ്ട്രേഷന് എംവിഡി രജിസ്ട്രേഷന് റദ്ദാക്കിയത്. നിരത്തുകളിലെ മറ്റ് വാഹനങ്ങള്ക്ക് പോലും ഭീഷണിയാകുന്ന തരത്തിലുള്ള ലൈറ്റുകളും ഹോണുകളുമാണ് ഈ വാഹനത്തില് നല്കിയിട്ടുള്ളതെന്നാണ് മോട്ടോര്വാഹന വകുപ്പ് ആരോപിക്കുന്നത്.
തുടര്ന്ന് ഇരുവരും സംഘടിച്ചെത്തി കണ്ണൂര് ആര്ടി ഓഫീസില് എത്തി ബഹളം വയ്ക്കുകയും ഏറെ നാശനഷ്ടങ്ങള് ഉണ്ടാക്കുകയും ചെയ്തിരുന്നു. പിന്നാലെപൊതുമുതല് നശിപ്പിക്കുകയും, ഔദ്യോഗിക കൃത്യനിര്വഹണത്തിന് തടസം നില്ക്കുകയും ചെയ്ത കേസില് ഇ ബുള് ജെറ്റ് സഹോദരങ്ങള് അറസ്റ്റിലായിരുന്നു. റിമാന്ഡിലായതിന്റെ പിറ്റേ ദിവസം മജിസ്ട്രേറ്റ് കോടതി ഇവര്ക്ക് ജാമ്യം അനുവദിച്ചിരുന്നു. . പത്ത് വകുപ്പുകളാണ് കണ്ണൂര് ടൗണ് പോലീസ് ഇവര്ക്കെതിരെ ചുമത്തിയിട്ടുള്ളത്.
