ആലുവയില്‍ ഗുഡ്‌സ് പാളം തെറ്റിയ സംഭവം; അഞ്ച് ട്രെയിനുകള്‍ റദ്ദാക്കി, ഒരു വരിയിലൂടെയുള്ള ഗതാഗതം പുനസ്ഥാപിച്ച് ട്രെയിന്‍ കടത്തിവിട്ടു തുടങ്ങി

കൊച്ചി : ആലുവയില്‍ ഗുഡ്‌സ് ട്രെയിന്‍ പാളം തെറ്റിയതിനെ തുടര്‍ന്ന് ഇന്റര്‍സിറ്റി അടക്കമുള്ള അഞ്ച് ട്രെയിനുകള്‍ റദ്ദാക്കി. ഈ വഴിയുള്ള ഗതാഗതം തടസ്സപ്പെട്ടെങ്കിലും ഒരു വരിയിലൂടെയുള്ളത് പുനസ്ഥാപിച്ചിട്ടുണ്ട്. വ്യാഴാഴ്ച രാത്രി 10.30ഓടെയാണ് ഗുഡ്‌സ് ട്രെയിന്‍ പാളം തെറ്റിയത്. 

കൊല്ലത്തേക്ക് 42 വാഗണ്‍ സിമന്റുമായി പോകുന്നതിനിടെയാണ് അപകടം സംഭവിക്കുന്നത്. ട്രെയിന്‍ എഞ്ചിന്‍ കഴിഞ്ഞ് 2,3,4,5 വാഗണുകളാണ് ആലുവ റെയില്‍വെ സ്റ്റേഷനിലെ മൂന്നാം പ്ലാറ്റ്‌ഫോമിനോട് ചേര്‍ന്നുള്ള പാളത്തില്‍ വെച്ച് അപകടത്തില്‍പെടുകയായിരുന്നു. ട്രാക്ക് മാറുന്നതിനിടെ അവസാന ബോഗികളാണ് തെന്നിമാറുകയായിരുന്നു. ആളപായമില്ല. ട്രെയിന്‍ ഗതാഗതം പുനസ്ഥാപിക്കാന്‍ രാത്രി തന്നെ ശ്രമം തുടങ്ങിയതാണ്. പുലര്‍ച്ചെ 2.15 ഓടെ ഒരു പാതയില്‍ ട്രാഫിക് പുനഃസ്ഥാപിച്ച് ഒരു വരി പാതയിലൂടെ ട്രെയിന്‍ കടത്തി വിട്ടു തുടങ്ങി.  

അപകടത്തെ തുടര്‍ന്ന് അഞ്ച് ട്രെയിനുകള്‍ റദ്ദാക്കി. ഗുരുവായൂര്‍ തിരുവനന്തപുരം- ഇന്റര്‍സിറ്റി (16341), എറണാകുളം- കണ്ണൂര്‍ ഇന്റര്‍സിറ്റി(16305), കോട്ടയം-നിലമ്പൂര്‍ എക്‌സ്പ്രസ് (16326), നിലമ്പുര്‍- കോട്ടയം എക്‌സ്പ്രസ്സ്(16325), ഗുരുവായൂര്‍- എറണാകുളം എക്‌സ്‌പ്രെസ്(06439)

രണ്ട് ട്രെയിനുകള്‍ ഭാഗീകമായി റദ്ദാക്കി. പുനലൂര്‍ നിന്ന് വ്യാഴാഴ്ച പുറപ്പെട്ട ഗുരുവായൂര്‍ എക്‌സ്പ്രസ്(16328) തൃപ്പൂണിത്തുറയില്‍ സര്‍വീസ് അവസാനിപ്പിച്ചു. ചെന്നൈ എഗ്മോറില്‍ നിന്ന് പുറപ്പെട്ട ഗുരുവായൂര്‍ പ്രതിദിന എക്‌സ്പ്രസ്(16127) എറണാകുളത്ത് സര്‍വീസ് അവസാനിപ്പിച്ചു.  പുലര്‍ച്ചെ 5.15ന് പുറപ്പെടേണ്ട എറണാകുളം- പൂനെ എക്‌സ്‌പ്രെസ് മൂന്ന് മണിക്കൂര്‍ വൈകിയാണ് പുറപ്പെട്ടത്.