ന്യൂദല്‍ഹി: ട്രെയ്‌നുകളില്‍ പുതിയ പെരുമാറ്റ ചട്ടവുമായി ഇന്ത്യന്‍ റെയില്‍വേ. യാത്രക്കാര്‍ക്ക് ആരോചകമാകുന്ന ഒന്നും മറ്റു യാത്രക്കാരില്‍ നിന്ന് ഉണ്ടാകാന്‍ പാടില്ലെന്നാണ് പുതിയ നിയമം. ഇതു പ്രകാരം സഹയാത്രികര്‍ക്ക് അരോചകമാകും വിധം ഉച്ചത്തിലുള്ള സംഗീതവും ഉറക്കെ ഫോണുകളില്‍ സംസാരിക്കുന്നതും നിരോധിച്ചിട്ടുണ്ട്. ഏതെങ്കിലും യാത്രക്കാര്‍ക്ക് ഇത്തരത്തില്‍ അസൗകര്യം നേരിട്ടാല്‍, ട്രെയിന്‍ ജീവനക്കാര്‍ ഉത്തരവാദി കളായിരിക്കും. കൂടാതെ, കൂട്ടമായി യാത്ര ചെയ്യുന്ന യാത്രക്കാരെ രാത്രി വൈകി വരെ സംസാരിക്കാന്‍ അനുവദിക്കില്ല , ട്രെയിനിലെ നാരോ രാത്രി ലൈറ്റ് ഒഴികെയുള്ള എല്ലാ ലൈറ്റുകളെല്ലാം രാത്രി 10 മണിക്ക് ശേഷം അണയ്ക്കും.
നിയമങ്ങള്‍ പാലിക്കാത്ത യാത്രക്കാരനെ റെയില്‍വേ നിയമ വ്യവസ്ഥകള്‍ അനുസരിച്ച് കര്‍ശനമായി നേരിടും, പിഴ ഈടാക്കും. യാത്രക്കാര്‍ക്ക് യാതൊരു അസൗകര്യവും ഉണ്ടാക്കുന്നില്ലെന്ന് ഉറപ്പാക്കാന്‍, മാന്യമായ പെരുമാറ്റവും പാലിക്കാന്‍ യാത്രക്കാരോട് ആവശ്യപ്പെടാനുള്ള ഉത്തരവാദിത്തം ആര്‍പിഎഫ്, ടിക്കറ്റ് ചെക്കര്‍മാര്‍, കോച്ച് അറ്റന്‍ഡന്റുകള്‍, കാറ്ററിംഗ് സ്റ്റാഫ് എന്നിവരുള്‍പ്പെടെയുള്ള ട്രെയിന്‍ ജീവനക്കാര്‍ക്കായിരിക്കുമെന്നു ഉത്തരവില്‍ വ്യക്തമാക്കുന്നു. ഇയര്‍ഫോണിലൂടെ പാട്ടു കേള്‍ക്കുന്നതല്ലാതെ ഉച്ചത്തില്‍ ട്രെയിനില്‍ പാട്ടു വയ്‌ക്കുന്നത് മറ്റു യാത്രക്കാര്‍ക്ക് അസൗകര്യമാകുന്നെന്ന പരാതി നേരത്തേ ഉയര്‍ന്നിരുന്നു.
