തിരുവനന്തപുരം: സിപിഎം തിരുവനന്തപുരം ജില്ലാ സമ്മേളനത്തില്‍ രണ്ടാം പിണറായി സര്‍ക്കാരിന്റെ കീഴിലുള്ള മന്ത്രിമാരുടെ ഓഫീസുകള്‍ക്ക് നേരെ കഠിന വിമര്‍ശനമുയര്‍ത്തി വി.കെ. പ്രശാന്ത് എംഎല്‍എ. കമ്മ്യൂണിസ്റ്റുകാരുടെ അന്തസത്ത കളഞ്ഞുകുളിക്കുന്ന ബൂര്‍ഷ്വാപ്രവണതകള്‍ നിറഞ്ഞ കേന്ദ്രങ്ങളായി രണ്ടാം പിണറായി സര്‍ക്കാരിലെ ചില മന്ത്രിമാരുടെ ഓഫീസുകള്‍ മാറുന്നുവെന്നാണ് വി.കെ. പ്രശാന്തിന്റെ പരാതിയുടെ അടിസ്ഥാനം.
പാളയം ഏരിയകമ്മിറ്റിയെ പ്രതിനിധീകരിച്ചാണ് വി.കെ. പ്രശാന്ത് അഭിപ്രായങ്ങള്‍ തുറന്നടിച്ചത്. കൂട്ടത്തില്‍ അദ്ദേഹം ആരോഗ്യമന്ത്രി വീണാജോര്‍ജ്ജിനും വ്യവസായമന്ത്രി പി. രാജീവിനും അവരുടെ ഓഫീസുകള്‍ക്കും എതിരെ പ്രത്യേകം വിമര്‍ശനമുയര്‍ത്തിയതായി അറിയുന്നു.
പൊതുവെ മന്ത്രിമാരുടെ ഓഫീസുകള്‍ക്ക് വേഗം പോരാ എന്നതാണ് ഒരു വിമര്‍ശനം. പാവങ്ങള്‍ക്ക് കയറിച്ചെല്ലാന്‍ കഴിയാത്ത സ്ഥിതിവിശേഷമാണ് ആരോഗ്യമന്ത്രിയുടെ ഓഫീസിലെന്നും വി.കെ. പ്രശാന്ത് പറഞ്ഞു. വ്യവസായ മന്ത്രി പി. രാജീവിന്റെ ഓഫീസിനെതിരെയും ശക്തമായ വിമര്‍ശനം ഉയര്‍ന്നു. ഇവിടം പ്രമാണികളുടെ കേന്ദ്രമാണെന്നതാണ് ആരോപണം.
