തിരുവനന്തപുരം: മുന്‍ ആരോഗ്യമന്ത്രി വീണ ജോര്‍ജിനെ ആയുധം ഉപയോഗിച്ച് കെഎസ്‌യു പ്രവര്‍ത്തകര്‍ ആക്രമിച്ചെന്ന കേസില്‍ തുടരന്വേഷണത്തിന് പ്രത്യേക അന്വേഷണ സംഘം.ഡിജിപി ഉത്തരവിറക്കി. കെഎപി നാലാം ബറ്റാലിയന്‍ കമാണ്ടന്റ് യു പ്രേമന്‍ ആണ് എസ് ഐ ടി തലവന്‍. കണ്ണൂര്‍ സിറ്റി എസിപി ആസാദാണ് അന്വേഷണ ഉദ്യോഗസ്ഥന്‍.
പ്രതിഷേധിച്ച കെഎസ്‌യു പ്രവര്‍ത്തകര്‍ ആയുധം ഉപയോഗിച്ച് റെയില്‍വേ സ്റ്റേഷനില്‍ വെച്ച് വീണ ജോര്‍ജിനെ ആക്രമിച്ചുവെന്നാണ് കേസ്. കള്ളക്കേസെടുത്തതിലെ ഗൂഢാലോചന അന്വേഷിക്കണമെന്ന ടി ഒ മോഹനന്‍ എംഎല്‍എയുടെയും കെഎസ്‌യു പ്രവര്‍ത്തകരുടെയും പരാതിയിലാണ് തുടരന്വേഷണം.
ഈ വര്‍ഷം ഫെബ്രുവരി 25നായിരുന്നു കണ്ണൂര്‍ റെയില്‍വേ സ്റ്റേഷനില്‍വെച്ച് വീണാ ജോര്‍ജിനെതിരെ കെഎസ്‌യു പ്രവര്‍ത്തകര്‍ കരിങ്കൊടി കാട്ടി പ്രതിഷേധിച്ചത്. സംഭവത്തില്‍ അഞ്ച് കെഎസ്‌യു പ്രവര്‍ത്തകര്‍ അറസ്റ്റിലായി. മന്ത്രിക്ക് പരിക്കേറ്റതിനെ തുടര്‍ന്ന് കെഎസ്‌യു പ്രവര്‍ത്തകര്‍ക്കെതിരെ വധശ്രമം അടക്കമുള്ള വകുപ്പുകള്‍ ചുമത്തി. ആയുധം ഉപയോഗിച്ച് കഴുത്തിന് പരിക്കേല്‍പ്പിച്ചെന്നായിരുന്നു മുന്‍ മന്ത്രിയുടെ ഗണ്‍മാന്‍ പരാതിപ്പെട്ടത്. എന്നാല്‍ കരിങ്കൊടി പ്രതിഷേധത്തിനിടെ ഉന്തുംതള്ളും മാത്രമാണ് ഉണ്ടായതെന്ന് വീണാ ജോര്‍ജ് പിന്നീട് മൊഴി നല്‍കി.. തെരഞ്ഞെടുപ്പ് കഴിയും വരെ മന്ത്രി മൊഴി നല്‍കിയിരുന്നില്ല. മൊഴിയെടുക്കാന്‍ അന്വേഷണ സംഘം പലവട്ടം ശ്രമിച്ചെങ്കിലും നടന്നില്ല. ഒടുവില്‍ കേസ് രണ്ടുമാസം പൂര്‍ത്തിയാകുമ്പോഴാണ് മന്ത്രി മൊഴി നല്‍കിയത്. ഭരണമാറ്റത്തോടെ കള്ളക്കേസിന് പിന്നിലെ ഗൂഢാലോചന അന്വേഷിക്കണമെന്ന പരാതി അഭ്യന്തരമന്ത്രി രമേശ് ചെന്നിത്തലയ്‌ക്ക് മുമ്പാകെ എത്തി. നിയമപദേശം തേടിയ ശേഷമാണ് തുടരന്വേഷണത്തിനുള്ള തീരുമാനം.
