തിരുവനന്തപുരം: കോണ്ഗ്രസിന് ബദലാകാന് ഇടതുപക്ഷത്തിന് സാധിക്കില്ലായെന്നും കോണ്ഗ്രസ് ദുര്ബലപ്പെടരുത് എന്നുമുള്ള സിപിഐയുടെ നയത്തിനെതിരെ പരസ്യ പ്രതികരണവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ന്. ബിജെപിയെ പ്രതിരോധിക്കാന് കോണ്ഗ്രസിന് കഴിയില്ല. കോണ്ഗ്രസ് നയങ്ങളാണ് ബിജെപിയെ അധികാരത്തിലെത്തിച്ചതെന്നും കോടിയേരി പ്രതികരിച്ചു.
കോണ്ഗ്രസിന്റെ വര്ഗീയ പ്രീണന നയം സംഘപരിവാര് ഉപയോഗപ്പെടുത്തി. സംഘപരിവാറിന്റെ വര്ഗീയ രാഷ്ട്രീയത്തിനെതിരെ രാഷ്ട്രീയമായോ പ്രത്യയശാസ്ത്രപരമായോ സംഘടനാപരമായോ പ്രതിരോധം തീര്ക്കാന് കോണ്ഗ്രസ് തയ്യാറാകാത്തത് പാര്ട്ടിയുടെ തകര്ച്ചയിലേക്ക് നയിച്ചു. കോണ്ഗ്രസിന് പകരമായി പ്രാദേശിക കക്ഷികളുടെ നേതൃത്വത്തിലുള്ള ബദലാണ് വേണ്ടതെന്നും ദേശാഭിമാനിയില് എഴുതിയ ലേഖനത്തില് കോടിയേരി വ്യക്തമാക്കി.
കോണ്ഗ്രസ് തകര്ന്നാല് ആ ശൂന്യത നികത്താന് ഇന്ന് ഇന്ത്യയില് ഇടതുപക്ഷത്തിന് കഴിവില്ലെന്ന സിപിഐ കേന്ദ്രകമ്മിറ്റി അംഗം ബിനോയ് വിശ്വമാണ് ആദ്യം പ്രതികരിച്ചത്. സിപിഐ സംസ്ഥാന സെക്രട്ടറി കാനം രാജേന്ദ്രനും ബിനോയ് വിശ്വത്തിന്റെ പ്രസ്താവനയെ പിന്തുണച്ചു. ഇതാണ് സിപിഎമ്മിനെ ചൊടിപ്പിച്ചത്.
