സെഞ്ചൂറിയന്: ഇന്ത്യ- ദക്ഷിണാഫ്രിക്ക ഒന്നാം ക്രിക്കറ്റ് ടെസ്റ്റില് ഒരു ടീം വിജയിക്കുമെന്ന് ഉറപ്പായി. ജയം ആരെ തുണയ്ക്കുമെന്ന് ഇന്നറിയാം. 305 റണ്സ് വിജയലക്ഷ്യത്തിലേക്ക് ബാറ്റുപിടിക്കുന്ന ദക്ഷിണാഫ്രിക്ക നാലാം ദിനം കളി നിര്ത്തുമ്പോള് നാല് വിക്കറ്റ് നഷ്ടത്തില് 94 റണ്സ് എടുത്തു. ജയിക്കാന് അവര്ക്ക് ഇനി 211 റണ്സ് വേണം. അതേസമയം ഇന്ത്യക്ക് ജയിക്കാന് ആറു വിക്കറ്റും.
ഒന്നാം ഇന്നിങ്സില് 130 റണ്സ് ലീഡ് നേടിയ ഇന്ത്യ രണ്ടാം ഇന്നിങ്സില് 174 റണ്സിന് പുറത്തായതോടെയാണ് ദക്ഷിണാഫ്രിക്കയുടെ വിജയലക്ഷ്യം 305 റണ്സായത്. ജയം ലക്ഷ്യമിട്ട് രണ്ടാം ഇന്നിങ്സ് തുടങ്ങിയ ദക്ഷിണാഫ്രിക്കയ്ക്ക് ഓപ്പണര് എയ്ഡന് മാര്ക്രം (1), കീഗന് പീറ്റേഴ്സണ് (17) റാസി വാന്ഡെര് ഡുസന് (11), കേശവ് മഹാരാജ് (8) എന്നിവരുടെ വിക്കറ്റുകളാണ് നഷ്ടമായത്. ക്യാപ്റ്റന് ഡീന് എല്ഗാര് 52 റണ്സുമായി കീഴടങ്ങാതെ നില്ക്കുകയാണ്. ഇന്ത്യന് പേസര് ജസ്പ്രീത് ബുംറ രണ്ട് വിക്കറ്റും മുഹമ്മദ് ഷമി, മുഹമ്മദ് സിറാജ് എന്നിവര് ഓരോ വിക്കറ്റും വീഴ്ത്തി. നേരത്തെ ഒരു വിക്കറ്റിന് 16 റസെന്ന സ്കോറിന് ഇന്നിങ്സ് പുനരാരംഭിച്ച ഇന്ത്യ ദക്ഷിണാഫ്രിക്കന് പേസ് നിരയ്ക്ക് മുന്നില് അനായാസം ബാറ്റ് താഴ്ത്തി.
മൂന്നാം ദിനത്തില് നാലു റണ്സുമായി കീഴടങ്ങാതെ നിന്ന ഷാര്ദുല് താക്കുറിനെ വീഴത്തി കഗിസോ റബഡയാണ് ഇന്ത്യയുടെ തകര്ച്ചയ്ക്ക് തുടക്കമിട്ടത്. തലേദിവസത്തെ സ്കോറിനോട് ആറു റണ്സ് കൂട്ടിച്ചേര്ത്ത താക്കുര് റബഡയുടെ പന്തില് മുള്ഡര്ക്ക് ക്യാച്ച് നല്കി. തുടര്ന്ന് ഓരോ ഇടവേളകളിലും വിക്കറ്റുകള് വീണു. ആദ്യ ഇന്നിങ്സില് സെഞ്ച്വറി കുറിച്ച കെ.എല്. രാഹുല് 23 റണ്സിന് കീഴടങ്ങി. 34 പന്തില് 34 റണ്സ് അടിച്ചെടുത്ത ഋഷഭ്് പന്താണ് ടോപ്പ് സ്കോറര്. ആറു പന്ത് ഋഷഭ് അതിര്ത്തികടത്തി. ക്യാപ്റ്റന് വിരാട് കോഹ്ലി 18 റണ്സിനും അജിങ്ക്യ രഹാനെ 20 റണ്സിനും പുറത്തായി. നാലാം ദിനത്തില് ചായസമയത്തിന് മുമ്പ് ഇന്ത്യ ഓള് ഔട്ടായി. ദക്ഷിണാഫ്രിക്കയ്ക്കായി പേസര്മാരായ കഗിസോ റബഡയും മാര്ക്കോ യാന്സനും നാലു വിക്കറ്റുകള് വീതം വീഴ്ത്തി. റബഡ 17 ഓവറില് 42 റണ്സ് വിട്ടുകൊടുത്തപ്പോള് യാന്സന് 13.3 ഓവറില് 55 റണ്സ് വഴങ്ങി. മറ്റൊരു പേസറായ ലുങ്കി എന്ഗിഡി പത്ത് ഓവറില് 31 റണ്സിന് രണ്ട് വിക്കറ്റ് എടുത്തു.
സ്കോര്ബോര്ഡ്: ഇന്ത്യ ഒന്നാം ഇന്നിങ്സ് 327, ദക്ഷിണാഫ്രിക്ക: ഒന്നാം ഇന്നിങ്സ് 197, ഇന്ത്യ രണ്ടാം ഇന്നിങ്സ്: കെ.എല്. രാഹുല് സി എല്ഗാര് ബി എന്ഗിഡി 23, മായങ്ക് അഗര്വാള് സി ഡികോക്ക് ബി യാന്സന് 4, ഷാര്ദുല് താക്കുര് സി മുള്ഡര് ബി റബഡ 10, ചേതേശ്വര് പൂജാര സി ഡികോക്ക് ബി എന്ഗിഡി 16, വിരാട് കോഹ്ലി സി ഡികോക്ക് ബി യാന്സന് 18, അജിങ്ക്യ രഹാനെ സി വാന്ഡെര് ഡുസന് ബി യാന്സന് 20, ഋഷഭ് പന്ത് സി എന്ഗിഡി ബി റബഡ 34, രവിചന്ദ്രന് അശ്വിന് സി പീറ്റേഴ്സണ് ബി റബഡ 14, മുഹമ്മദ് ഷമി സി മുള്ഡര് ബി റബഡ 1, ജസ്പ്രീത് ബുംറ നോട്ടൗട്ട് 7, മഹുമ്മദ് സിറാജ് ബി യാന്സന് 0, എക്സ്ട്രാസ് 27, ആകെ 174.
വിക്കറ്റ് വീഴ്ച: 1-12, 2-34, 3-54, 4-79, 5-109, 6-111, 7-146, 8-166, 9-169, 10-174.
ബൗളിങ്: കഗിസോ റബഡ 17-4-42-4, ലുങ്കി എന്ഗിഡി 10-2-31-2, മാര്ക്കോ യാന്സന് 13.3-4-55-4, വിയാന് മുള്ഡര് 10-4-25-0.
