ദുബായ്: അണ്ടര്‍ 19 ഏഷ്യ കപ്പ് ക്രിക്കറ്റ് ടൂര്‍ണമെന്റില്‍ ഇന്ത്യയ്‌ക്ക് ജയത്തോടെ തുടക്കം. 154 റണ്‍സിന് യു.എ.ഇയെ തകര്‍ത്തുകൊണ്ടാണ് ഇന്ത്യ വിജയം കൈവരിച്ചത്. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ അഞ്ചുവിക്കറ്റ് നഷ്ടത്തില്‍ 282 റണ്‍സെടുക്കുകയായിരുന്നു. മറുപടി ബാറ്റിങ്ങിനിറങ്ങിയ യു.എ.ഇ 34.3 ഓവറില്‍ 128 റണ്‍സ് എടുത്ത് ഓള്‍ ഔട്ട് ആയി.
ഇന്ത്യയ്‌ക്ക് വേണ്ടി ഹര്‍നൂര്‍ സെഞ്ചുറി നേടുകയും ചെയ്തു. 130 പന്തുകളില്‍ നിന്ന് 120 റണ്‍സാണ് സ്വന്തമാക്കിയത്. യാഷ് ധുല്ല് 68 പന്തുകളില്‍ നിന്ന് 63 റണ്‍സെടുത്ത് മികച്ച പ്രകടനവും കാഴ്ച വച്ചു. അവസാന ഓവറുകളില്‍ വെടിക്കെട്ട് പ്രകടനം കാഴ്ചവെച്ച രാജ് വര്‍ധന്‍ ഹങ്കര്‍ഗേക്കറാണ് ടീം സ്‌കോര്‍ 280 കടത്തിയത്.
283 റണ്‍സ് വിജയലക്ഷ്യവുമായി ബാറ്റിങ്ങിനിറങ്ങിയ യു.എ.ഇക്ക് ഇന്ത്യയുടെ ബൗളിങ്ങിനുമുന്നില്‍ താളം തെറ്റി. വളരെ വേഗത്തില്‍ തന്നെ വിക്കറ്റുകള്‍ നഷ്ടമായി. അടുത്ത മത്സരത്തില്‍ പാകിസ്താനാണ് ഇന്ത്യയുടെ എതിരാളികള്‍. മറ്റ് മത്സരങ്ങളില്‍ പാകിസ്താന്‍ അഫ്ഗാനിസ്താനെയും ശ്രീലങ്ക കുവൈറ്റിനെയും പരാജയപ്പെടുത്തി.
