കണ്ണൂര്: സിപിഎം ജില്ലാസമ്മേളനങ്ങളില് ആദ്യത്തേത് കണ്ണൂരില് തുടങ്ങിയപ്പോള് ആദ്യവസാനം മുഖ്യമന്ത്രി പിണറായി വിജയന്. സര്ക്കാരിനും പാര്ട്ടിക്കുമെതിരേ മിണ്ടിപ്പോകരുത്, ഞാനിവിടെയുണ്ട് എന്ന കര്ശന സന്ദേശം സംസ്ഥാനത്തെ മുഴുവന് സഖാക്കള്ക്കും നല്കുന്നതാണ് ഈ സാന്നിധ്യം.
മാടായി സഹകരണബാങ്ക് ഓഡിറ്റോറിയത്തിലാണ് മൂന്നു നാള് സമ്മേളനം. ആദ്യമായാണ് പിബി അംഗവും മുഖ്യമന്ത്രിയുമായ പിണറായി ആദ്യവസാനം സമ്മേളനത്തില് പങ്കെടുക്കുന്നത്. സംസ്ഥാന സെക്രട്ടറി കോടിയേരി ബാലകൃഷ്ണനും മുഴുവന് സമയമുണ്ട്. സമ്മേളനത്തില് ഗ്രൂപ്പ്-പൊതുചര്ച്ചകള് നടക്കുമ്പോഴും പിണറായി ഉണ്ടാകും.
മുഖ്യമന്ത്രിയുടെ തട്ടകമായ കണ്ണൂരില് പാര്ട്ടിക്കുള്ളില് നീറുന്ന ഒട്ടേറെ വിവാദ വിഷയങ്ങളുണ്ട്. പിണറായിയുടേയും കോടിയേരിയുടേയും സാന്നിധ്യത്തില് ഇത്തരം വിഷയങ്ങള് ചര്ച്ച ചെയ്യാന് തയ്യാറാകില്ലെന്ന നിഗമനത്തിലാണ് ഇരുവരും സംബന്ധിക്കുന്നത്. ആദ്യ സമ്മേളനമായ കണ്ണൂര് മോഡല് മറ്റ് സമ്മേളനങ്ങളിലും നടപ്പാക്കാനാണ് ലക്ഷ്യം.
പി. ജയരാജനെ ജില്ലാ സെക്രട്ടറി സ്ഥാനത്തു നിന്നും നീക്കിയതു മുതല് കെ. റെയിലില് വരെ വിമര്ശനമുയരുമെന്ന ആശങ്കയും മുഖ്യമന്ത്രിക്കുണ്ട്. പിണറായിയുടെയും കോടിയേരിയുടെയും സാന്നിധ്യത്തില് കടുത്ത വിമര്ശന ശീലരും മിണ്ടില്ലെന്നാണ് സ്ഥിതി.
