തൃശൂര്‍: ജനറല്‍ ബിപിന്‍ റാവത്തിനൊപ്പം ഹെലികോപ്റ്റര്‍ അപകടത്തില്‍ മരിച്ച വ്യോമസേന ജൂനിയര്‍ വാറന്റ് ഓഫീസര്‍ എ. പ്രദീപിന്റെ ഭൗതികശരീരം ഇന്ന് കോയമ്പത്തൂരിലെത്തിക്കും. കോയമ്പത്തൂര്‍ സുലൂരിലെ വ്യോമകേന്ദ്രത്തില്‍ പൊതുദര്‍ശനത്തിനു ശേഷം വിലാപയാത്രയായി റോഡു മാര്‍ഗം മൃതദേഹം തൃശൂര്‍ പൊന്നൂക്കരയിലെ വീട്ടിലേക്ക് കൊണ്ടുവരും.
പ്രദീപ് പഠിച്ച പുത്തൂര്‍ ഗവ. സ്‌കൂളില്‍ ഭൗതികദേഹം പൊതുദര്‍ശനത്തിനു വെയ്‌ക്കും. പ്രദീപിന്റെ കുടുംബത്തിനുള്ള അടിയന്തര ധനസഹായം ജില്ലാ സൈനിക ക്ഷേമ ഓഫീസര്‍ വീട്ടില്‍ നേരിട്ടെത്തി കൈമാറി. പൂര്‍ണ ഔദ്യോഗിക ബഹുമതികളോടെയാകും ചടങ്ങുകള്‍ നടക്കുക.
2004ലാണ് പ്രദീപ് വ്യോമസേനയുടെ ഭാഗമായത്. കോയമ്പത്തൂരിലെ സുലൂര്‍ വ്യോമത്താവളത്തിലായിരുന്നു പ്രദീപ് സേവനം അനുഷ്ഠിച്ചിരുന്നത്. വെല്ലിംഗ്ടണില്‍ ജൂനിയര്‍ കേഡറ്റ് ഓഫീസര്‍മാരുടെ സെമിനാറില്‍ സംസാരിക്കുന്നതിന് വേണ്ടിയായിരുന്നു ജനറല്‍ ബിപിന്‍ റാവത്ത് യാത്ര തിരിച്ചത്. ഇതിനായി സുലൂര്‍ വ്യോമത്താവളത്തില്‍ നിന്നും അദേഹത്തെ അനുഗമിച്ച സൈനിക ഉദ്യോഗസ്ഥരില്‍ ഒരാളായിരുന്നു പ്രദീപ്.
