തിരുവനന്തപുരം : ജാഗ്രതാ നിര്ദ്ദേശങ്ങളൊന്നും പാലിക്കാതെ മുല്ലപ്പെരിയാര് ഡാമിലെ വെള്ളം തമിഴ്നാട് സാമാന്യ മര്യാദ ലംഘിച്ചെന്ന് രൂക്ഷ വിമര്ശനവുമായി റവന്യൂ വകുപ്പ് മന്ത്രി കെ. രാജന്. കേരളം കടുക്ക നിലപാടുമായി മുന്നോട്ട് പോകുമെന്നും മന്ത്രി പറഞ്ഞു. മുല്ലപ്പെരിയാറിലെ വെള്ളം മുന്നറിയിപ്പില്ലാതെ തുറന്നുവിട്ടതില് പ്രതികരിക്കുകയായിരുന്നു അദ്ദേഹം.
‘ഒരു സംസ്ഥാനം ജനങ്ങളോട് കാണിക്കേണ്ട സാമാന്യ മര്യാദ തമിഴ്നാട് കാണിക്കുമെന്ന് കരുതി. അതുണ്ടായില്ല. പല തവണ ജനങ്ങളുടെ ബുദ്ധിമുട്ടുകള് അടക്കം അറിയിച്ച് കേരളം, തമിഴ്നാട് സര്ക്കാരിനെ ബന്ധപ്പെട്ടു. എന്നാല് തമിഴ്നാട് തത്സ്ഥിതി ആവര്ത്തിക്കുകയാണ്. ഇനി ശക്തമായ നടപടിയുമായി മുന്നോട്ട് പോകാനാണ് സംസ്ഥാന സര്ക്കാരിന്റെ തീരുമാനം. ഇതിന്റെ ഭാഗമായി വിഷയം സുപ്രീം കോടതിയില് ഗൗരവമായി ഉന്നയിക്കുമെന്നും മന്ത്രി അറിയിച്ചു.
തമിഴ്നാട് തോന്നുന്നത് പോലെ ഷട്ടറുകള് ഉയര്ത്തുകയും താഴ്ത്തുകയും ചെയ്യുന്നത് പെരിയാറിന് തീരത്തെ ജനങ്ങള്ക്ക് വളരെയധികം ബുദ്ധിമുട്ടുണ്ടാക്കുന്നുണ്ട്. സാമാന്യ സീമകള് ലംഘിച്ച നടപടിയാണിത്. ഇതെല്ലാം സുപ്രീം കോടതിയെ ധരിപ്പിക്കും. ജനങ്ങളുടെ സുരക്ഷയാണ് സംസ്ഥാന സര്ക്കാരിന് പ്രധാനം. തമിഴ്നാടിന്റെ നടപടിയില് ബുദ്ധിമുട്ടിലായ പെരിയാര് തീരത്തെ ജനങ്ങള്ക്ക് എല്ലാ സഹായവും ഉറപ്പ് വരുത്തും. ദുരിതാശ്വാസ ക്യാമ്പുകള് തയ്യാറാണ്. റവന്യൂ വകുപ്പിന്റെ ഉദ്യോഗസ്ഥര് പ്രദേശത്ത് ക്യാമ്പ് ചെയ്താണ് പ്രവര്ത്തനങ്ങള് നടത്തുന്നതെന്നും മന്ത്രി കൂട്ടിച്ചേര്ത്തു.
ജലനിരപ്പ് ഉയര്ന്നതോടെ മുല്ലപ്പെരിയാര് ഡാമിന്റെ ഒമ്പത് ഷട്ടറുകള് തമിഴ്നാട് തുറന്നു. 7140 ഘനയടി വെള്ളമാണ് തുറന്നുവിടുന്നത്. ഇതോടെ പെരിയാറിലെ ജലനിലപ്പ് ഉയരുകയും പ്രദേശത്തെ വീടുകളില് വെള്ളം പൊങ്ങുകയും ചെയ്തിരുന്നു. ഇന്ന് സുപ്രീം കോടതിയില് കേരളം വിഷയം ഉന്നയിക്കാനിരിക്കെയാണ് തമിഴ്നാടിന്റെ ഈ നടപടി. ഇതിനെതിരെ സംസ്ഥാനത്ത് വ്യാപക പ്രതിഷേധം ഉയര്ന്നിരിക്കുകയാണ്.
