കോട്ടയം: ഹലാല് വിഷയത്തില് മുഖ്യമന്ത്രി കക്ഷിയായതോടെ പോപ്പുലര് ഫ്രണ്ടിന്റെ അജണ്ട ഇടതുസര്ക്കാരിന്റെ സഹായത്തോടെയാണ് സംസ്ഥാനത്ത് നടപ്പാകുന്നതെന്ന് വ്യക്തമായതായി ബിജെപി സംസ്ഥാന അധ്യക്ഷന് കെ.സുരേന്ദ്രന്. ഹലാല് പ്രശ്നമുണ്ടാക്കുന്ന വര്ഗീയ ശക്തികളെ കാണാതിരിക്കുകയും വോട്ട്ബാങ്ക് രാഷ്ട്രീയത്തിന് വേണ്ടി ജനങ്ങളെ ഭിന്നിപ്പിക്കുകയുമാണ് മുഖ്യമന്ത്രി ചെയ്യുന്നത്. മുഖ്യമന്ത്രി സ്ഥാനത്തിന് നിരക്കാത്ത പ്രസ്താവനയാണ് അദേഹം നടത്തിയതെന്നും സുരേന്ദ്രന് വിമര്ശിച്ചു.
ഹലാല് എന്നത് ഭക്ഷണത്തിന്റെ മാത്രം പ്രശ്നമല്ല. മറിച്ച് അതൊരു ഭീകരവാദ അജണ്ടയാണെന്ന് സുരേന്ദ്രന് പറഞ്ഞു. എല്ലാ കാര്യത്തിലും ഹലാല് ഒളിച്ചുകടത്തുന്നുണ്ട്. പോപ്പുലര് ഫ്രണ്ടും ജമാഅത്തെ ഇസ്ലാമിയും പോലെയുള്ള ഇസ്ലാമിക തീവ്രവാദികളാണ് ഇതിന് പിന്നില്. ആഭ്യന്തരവകുപ്പ് കൈകാര്യം ചെയ്യുന്ന മുഖ്യമന്ത്രിക്ക് ഇതെല്ലാം അറിയാമെന്നും കോട്ടയത്ത് നടന്ന സംസ്ഥാന കോര്ഗ്രൂപ്പ് യോഗത്തിന് ശേഷം അദേഹം പ്രതികരിച്ചു.
മുഖ്യമന്ത്രിയുടേയും സര്ക്കാരിന്റെയും പരസ്യമായ പിന്തുണയോടെയാണ് തീവ്രവാദികള് പ്രവര്ത്തിക്കുന്നത്. സഞ്ജിത്തിന്റെ കൊലപാതക കേസ് എന്ഐഎക്ക് കൈമാറണമെന്ന ആവശ്യവും ഹലാല് വിഷയത്തില് സിപിഎമ്മിന്റെ നിലപാടും ഉന്നയിച്ച് ഡിസംബര് 13 ന് മുഖ്യമന്ത്രിയുടെ വീട്ടിലേക്ക് ബിജെപി മാര്ച്ച് നടത്തും. പാര്ട്ടിയുടെ മുതിര്ന്ന നേതാക്കള് മുഖ്യമന്ത്രിയുടെ വീടിന് മുമ്പില് സത്യാഗ്രഹം നടത്തുമെന്നും അദേഹം പറഞ്ഞു.
