ആലുവ: നിയമ വിദ്യാര്ഥിനി മോഫിയ പര്വീണ് (23) ആത്മഹത്യ ചെയ്ത സംഭവത്തില് ഭര്ത്താവ് ഇരമല്ലൂര് കുറ്റിലഞ്ഞി മലേക്കുടി മുഹമ്മദ് സുഹൈല് (27), ഭര്തൃമാതാവ് റുഖിയ (55), പിതാവ് യൂസഫ് (63) എന്നിവരെ 14 ദിവസത്തേക്കു റിമാന്ഡ് ചെയ്തു. ചൊവ്വാഴ്ച അര്ധരാത്രിയിലാണ് ഒളിവിലായിരുന്ന പ്രതികളെ ആലുവ ഈസ്റ്റ് പൊലീസ് കോട്ടപ്പടി ഉപ്പുകണ്ടത്തെ ബന്ധുവീട്ടില് നിന്ന് കസ്റ്റഡിയില് എടുത്തത്. ആലുവ ഫസ്റ്റ് ക്ലാസ് മജിസ്ട്രേറ്റ് കോടതിയാണ് പ്രതികളെ റിമാന്ഡ് ചെയ്തത്. ഇവരെ കാക്കനാട് ജില്ലാ ജയിലിലേക്ക് മാറ്റി.
തൊടുപുഴ അല് അസ്ഹര് ലോ കോളജിലെ മൂന്നാം വര്ഷ വിദ്യാര്ഥിയായ മോഫിയ പര്വീണിനെ തിങ്കളാഴ്ച വൈകിട്ടാണു വീട്ടിലെ കിടപ്പുമുറിയില് തൂങ്ങി മരിച്ച നിലയില് കണ്ടെത്തിയത്. ശാരീരികമായ പീഡനം മൂലമാണു ജീവനൊടുക്കുന്നതെന്നു മോഫിയ ആത്മഹത്യാക്കുറിപ്പില് എഴുതിയിരുന്നത്. ഐപിസി 304(ബി), 498(എ), 306, 34 എന്നീ വകുപ്പുകള് പ്രകാരം സ്ത്രീധന മരണം, ആത്മഹത്യാ പ്രേരണ, വിവാഹിതയ്ക്കെതിരെയുള്ള ക്രൂരത തുടങ്ങിയ കുറ്റങ്ങളാണു പ്രതികള്ക്കെതിരെ ചുമത്തിയിരിക്കുന്നത്.
സ്റ്റേഷനില് പരാതിയുമായി എത്തിയപ്പോള് മോശമായി പെരുമാറിയ ഇന്സ്പെക്ടര്ക്കെതിരെ നടപടിയെടുക്കണമെന്നും ആത്മഹത്യ കുറിപ്പില് രേഖപ്പെടുത്തിയിരുന്നു. അവളുടെ മരണത്തിന് കാരണക്കാരനായ സിഐയെ സ്ഥലം മാറ്റിയത്കൊണ്ടും സസ്പെന്ഷന് കൊണ്ടും കാര്യമില്ല. ജോലിയില് നിന്ന് തന്നെ പിരിച്ചുവിടണമെന്ന് മൊഫിയയുടെ മാതാവ് ആവശ്യപ്പെട്ടു.
