ഇടുക്കി: വൃഷ്ടിപ്രദേശത്ത് ശക്തമായ മഴ തുടരുന്ന സാഹചര്യത്തില്‍ ആവശ്യമെങ്കില്‍ ജലനിരപ്പ് ക്രമീകരിക്കുന്നതിനായി ഇടുക്കി അണക്കെട്ടിന്റെ ഷട്ടര്‍ തുറന്നേക്കും. ജലനിരപ്പ് ഉയരുന്നതനുസരിച്ച് നാളെ വൈകിട്ടോ ഞായറാഴ്ച രാവിലെയോ 100 ക്യുമെക്സ് (സെക്കന്റില്‍ 1 ലക്ഷം ലിറ്റര്‍) വരെ ജലം പുറത്തേക്ക് ഒഴുക്കി വിടുന്നതിനാണ് ഇടുക്കി ജില്ലാ കളക്ടര്‍ ഷീബാ ജോര്‍ജ് അനുമതി നല്‍കി.
കേന്ദ്രകാലാവസ്ഥാ നിരീക്ഷകേന്ദ്രം നാളെയും മറ്റന്നാളും ജില്ലയില്‍ ഓറഞ്ച് അലര്‍ട്ട് പ്രഖ്യാപിച്ചിരുന്ന സാഹചര്യത്തില്‍ കൂടിയാണ് തീരുമാനം. നിലവില്‍ 2398.38 അടിയാണ് ഡാമിലെ ജലനിരപ്പ്. സംഭരണശേഷിയുടെ 94.58 ശതമാനമാണിത്. പരമാവധി സംഭരണശേഷി 2403 അടിയാണ്. വൃഷ്ടിപ്രദേശത്ത് ഇന്ന് രാവിലെ മുതല്‍ കനത്ത മഴ ലഭിക്കുന്നതിനാല്‍ ജലനിരപ്പ് ക്രമേണ ഉയരുന്നുണ്ട്. നിലവിലെ റൂള്‍ലെവല്‍ 2400.03 അടിയാണ്. ഇന്ന് രാവിലെ ജലനിരപ്പ് 2398.03 അടിയെത്തിയപ്പോള്‍ ഓറഞ്ച് അലര്‍ട്ട് പ്രഖ്യാപിച്ചിരുന്നു. 2399.03 അടിയെത്തിയാല്‍ റെഡ് അലര്‍ട്ട് പ്രഖ്യാപിക്കും.
വൃഷ്ടിപ്രദേശത്ത് ഇന്ന് രാവിലെ അവസാനിച്ച 24 മണിക്കൂറിനിടെ 142.2 മില്ലി മീറ്റര്‍ മഴയാണ് ലഭിച്ചത്. 13.672 ദശലക്ഷം ഘനമീറ്റര്‍ ജലമാണ് ഇന്നലെ രാവിലെ വരെയുള്ള 24 മണിക്കൂറില്‍ അണക്കെട്ടിലേക്ക് ഒഴുകിയെത്തിയത്. 17.318 ദശലക്ഷം യൂണിറ്റ് വൈദ്യുതിയാണ് ഇന്നലെ മൂലമറ്റം പവര്‍ഹൗസില്‍ ഉത്പാദിപ്പിച്ചത്. ആറ് ജനറേറ്ററുകളും പ്രവര്‍ത്തിപ്പിച്ച് കെഎസ്ഇബി പരമാവധി വൈദ്യുതി ഉത്പാദിപ്പിക്കുന്നുണ്ട്.
മുല്ലപ്പെരിയാര്‍ അണക്കെട്ടിലും ജലനിരപ്പ് ഉയരുകയാണ്. 139.20 അടിയാണ് ഏറ്റവും ഒടുവിലെ ജലനിരപ്പ്. നിലവിലെ റൂള്‍ ലെവലനുസരിച്ച് 20 വരെ 141 അടി ജലം തമിഴ്നാടിന് സംഭരിക്കാം. സെക്കന്‍ഡില്‍ 3967 ഘനയടി ജലമാണ് ഡാമിലേക്ക് ഒഴുകിയെത്തുന്നത്. എന്നാല്‍ സെക്കന്‍ഡില്‍ 467 ഘനയടി മാത്രമാണ് തമിഴ്നാട് ടണല്‍ വഴി വൈഗ ഡാമിലേക്ക് കൊണ്ടുപോകുന്നത്. വൈഗ ഡാമിലെ ജലനിരപ്പ് പരമാവധി സംഭരണശേഷിയായ 71 അടിയോട് അടുക്കുകയാണ്. അതിനാല്‍ അധികം ജലം ഇനി തമിഴ്നാടിന് കൊണ്ടുപോകാനാകില്ല. അവസാനം വിവരം ലഭിക്കുമ്പോള്‍ 69.5 അടിയാണ് ജലനിരപ്പ്.
ജന്മഭൂമി ഓണ്‍ലൈന്‍