തിരുവനന്തപുരം : അമ്പലപ്പുഴയിലെ ഇടത് സ്ഥാനാര്ത്ഥിക്ക് പിന്തുണ നല്കിയില്ല. തെരഞ്ഞെടുപ്പ് പ്രവര്ത്തനത്തില് വീഴ്ചയുണ്ടായെന്ന് ജി. സുധാകരനെതിരെ രൂക്ഷവിമര്ശനവുമായി സിപിഎം അന്വേഷണ സമിതി. പാര്ട്ടി നിര്ദ്ദേശ പ്രകാരം പാര്ട്ടി സംസ്ഥാന സെക്രട്ടേറിയറ്റ് അംഗങ്ങളായ എളമരം കരീം, കെ.ജെ.തോമസ് എന്നിവര് നടത്തിയ അന്വേഷണത്തിന്റെ റിപ്പോര്ട്ടിലാണ് ഈ പരാമര്ശം.
നിയമസഭാ തെരഞ്ഞെടുപ്പില് നിഷേധ സമീപനമാണ് സുധാകരന് സ്വീകരിച്ചതെന്നും റിപ്പോര്ട്ടില് പറയുന്നുണ്ട്. അന്വേഷണ സമിതി റിപ്പോര്ട്ട് സിപിഎം സംസ്ഥാന സമിതിയില് വെച്ചിട്ടുണ്ട്. അടുത്ത സെക്രട്ടറിയേറ്റ് യോഗത്തില് സുധാകരനെതിരെ നടപടിയുണ്ടാകാനാണ് സാധ്യത. കര്ശ്ശന നടപടിയെടുക്കാനാണ് തീരുമാനമെങ്കില് സുധാകരനെ തരംതാഴ്ത്തിയേക്കും.
അമ്പലപ്പുഴയിലെ സ്ഥാനാര്ത്ഥിയെ സുധാകരന് പിന്തുണച്ചില്ല. സാമ്പത്തിക പ്രതിസന്ധി മറികടക്കുന്നതിനും സഹായകരമായ നിലപാട് സ്വീകരിച്ചില്ല. സ്ഥാനാര്ഥിക്കെതിരെ നടന്ന പ്രചാരണങ്ങളെ പ്രതിരോച്ചില്ല, മൗനം നടിക്കുകയാണ് ഉണ്ടായതെന്നും സുധാകരനെ വിമര്ശിക്കുന്നുണ്ട്. റിപ്പോര്ട്ടില് എംഎല്എ എച്ച്. സലാമിനേയും വിമര്ശിക്കുന്നുണ്ട്. സലാം തെരഞ്ഞെടുപ്പ് കമ്മിറ്റിയുമായി സഹകരിച്ച് പ്രവര്ത്തിച്ചില്ല. ഒരുവിഭാഗക്കാരനാണെന്ന ആരോപണത്തെ മറികടക്കാന് ശ്രമിച്ചില്ലെന്നും ആരോപണമുണ്ട്.
സ്ഥാനാര്ത്ഥിത്വത്തില് നിന്നും ഒഴിവാക്കിയതിന് ശേഷം അമ്പലപ്പുഴ വിഷയം ചര്ച്ച ചെയ്ത സംസ്ഥാന കമ്മിറ്റിയോഗത്തിലും ജില്ലാ കമ്മിറ്റി യോഗത്തിലും സുധാകരന് പങ്കെടുത്തിരുന്നില്ല. തെരഞ്ഞെടുപ്പിന് ശേഷം ചേര്ന്ന ജില്ലാ കമ്മിറ്റി യോഗത്തിലാണ് സുധാകരന് തനിക്കു സഹകരണമൊന്നും നല്കിയില്ലെന്ന് സലാം ആരോപിച്ചത്. എസ്ഡിപിഐക്കാരനായി തന്നെ ചിത്രീകരിക്കാനുള്ള നീക്കങ്ങള്ക്ക് കൂട്ടുനിന്നെന്നും ആദ്യഘട്ടത്തില് പ്രചാരണത്തിനെത്തിയില്ലെന്നും സലാം കുറ്റപ്പെടുത്തി. യോഗത്തില് സുധാകരനെതിരെയുള്ള ആരോപണം ശക്തമായതോടെയാണ് ഇതുസംബന്ധിച്ച് അന്വേഷിക്കാന് ആക്ടിങ് സെക്രട്ടറി എ.വിജയരാഘവന് പ്രത്യേക സംഘത്തെ നിയോഗിച്ചത്.
