തലശ്ശേരി: മുസ്ലിം ലീഗ് പ്രവര്ത്തകന് പെരിങ്ങത്തൂരിലെ മന്സൂര് വധക്കേസില് ഒളിവില് കഴിയുന്ന പ്രതി സിപിഎം ലോക്കല് കമ്മിറ്റിയില്. കേസിലെ പത്താം പ്രതിയും പുല്ലൂക്കരയിലെ സി.പി.എം പ്രാദേശിക നേതാവുമായ പി.പി. ജാബിറിനെയാണ് കണ്ണംവെള്ളിയില് നടന്ന സമ്മേളനത്തില് പെരിങ്ങളം ലോക്കല് കമ്മിറ്റി അംഗമായി തെരഞ്ഞെടുത്തത്.
നേരത്തെ സി.പി.എം വള്ളുകണ്ടി ബ്രാഞ്ച് സെക്രട്ടറിയായിരുന്നു ജാബിര്. ലോക്കല് കമ്മിറ്റി 13 അംഗങ്ങളായാണ് തെരഞ്ഞെടുത്തത്. മൂന്നുപേര് പുതുമുഖങ്ങളാണ്. ലോക്കല് സെക്രട്ടറിയായി എന്. അനൂപിനെ തെരഞ്ഞെടുത്തു. ജാബിര് ഉള്പ്പെടെയുള്ള ലോക്കല് കമ്മിറ്റിയംഗങ്ങളെ തെരഞ്ഞെടുത്ത പോസ്റ്ററുകള് സി.പി.എം സൈബര് സഖാക്കള് സമൂഹ മാധ്യമങ്ങളില് വ്യാപകമായി പ്രചരിപ്പിക്കുന്നുണ്ട്.
2021-ലെ നിയമസഭാ തിരഞ്ഞെടുപ്പിന്റെ വോട്ടെടുപ്പ് ദിവസമാണ് മുസ്ലീം ലീഗ് പ്രവര്ത്തകനായ മന്സൂര് കൊല്ലപ്പെട്ടത്. കേസില് പിടിയിലായവരെല്ലാം പ്രാദേശിക സി.പി.എം. പ്രവര്ത്തകരായിരുന്നു. കേസിലെ പ്രതികളിലൊരാളായ രതീഷിനെ തൂങ്ങിമരിച്ചനിലയില് കണ്ടെത്തിയതും വിവാദമായിരുന്നു.
