ന്യൂദല്ഹി : രാജ്യത്തെ കോവിഡ് മാര്ഗ്ഗരേഖയില് കേന്ദ്ര സര്ക്കാര് മാറ്റം വരുത്തി. ഇതു പ്രകാരം കോവിഡ് ബാധിച്ച് 30 ദിവസത്തിനകം രോഗി മരിക്കുകയാണെങ്കില് അത് കോവിഡ് മരണമായി കണക്കാക്കും. സുപ്രീംകോടതി നിര്ദ്ദേശ പ്രകാരമാണ് മാര്ഗ്ഗരേഖയില് മാറ്റം വരുത്തിയത്. കോവിഡ് മരണം മൂലം നാല് ലക്ഷം രൂപ അടിയന്തര സഹായം അനുവദിക്കണമെന്ന് ആവശ്യപ്പെട്ടു കൊണ്ടുള്ള ഹര്ജിയുടെ പശ്ചാത്തലത്തില് സുപ്രീംകോടതി കേന്ദ്ര സര്ക്കാരിനോട് വിശദീകരണം തേടിയിരുന്നു. ഇതിന് കേന്ദ്ര സര്ക്കാര് നല്കിയ സത്യവാങ്മൂലത്തിലാണ് ഇക്കാര്യം വ്യക്തമാക്കുന്നത്.
നേരത്തെയുള്ള മാര്ഗരേഖ പ്രകാരം ടെസ്റ്റ് നടത്തി കോവിഡ് സ്ഥിരീകരിച്ച് 25 ദിവസത്തിനുള്ളില് മരണം സംഭവിച്ചാല് മാത്രമേ ഇത്തരത്തില് കോവിഡ് മരണമായി പരിഗണിച്ചിരുന്നുള്ളൂ. ഇതാണ് ഇപ്പോള് 30 ദിവസമായി ദീര്ഘിപ്പിച്ചിരിക്കുന്നത്.
എന്നാല് കോവിഡ് ബാധിച്ചശേഷമുള്ള ആത്മഹത്യ, കൊലപാതകം, അപകടമരണം എന്നിവയൊന്നും കോവിഡ് മരണമായി കണക്കാക്കില്ല. കോവിഡ് സ്ഥിരീകരിക്കുന്നതിനായി ആര്ടിപിസിആര്, ആന്റിജന് ടെസ്റ്റുകളും എടുക്കാവുന്നതാണ്. പുതിക്കിയ മാര്ഗ്ഗരേഖ ഐസിഎംആറും കേന്ദ്ര ആരോഗ്യമന്ത്രാലയവും സുപ്രീം കോടതിയില് സമര്പ്പിച്ചിട്ടുണ്ട്.
