ന്യൂദല്‍ഹി : വിദേശ രാജ്യങ്ങളിലേക്ക് യാത്രയ്‌ക്കാര്‍ക്കായി കോവിഡ് പരിശോധനാ ഫലം ഇനിമുതല്‍ കോവിന്‍ വെബ് പോര്‍ട്ടലില്‍ ലഭ്യമാക്കും. അന്തര്‍ സംസ്ഥാന, വിദേശ യാത്രകള്‍ക്ക് ആര്‍ടിപിസിആര്‍ പരിശോധനാ ഫലം നിര്‍ബന്ധമായതിന്റെ പശ്ചാത്തലത്തിലാണ് കോവിന്‍ സൈറ്റിലും ഇത് ലഭ്യമാക്കുന്നത്. ഉടന്‍ തന്നെ ഇത് പ്രാബല്യത്തില്‍ വരുമെന്ന് നാഷണല്‍ ഹെല്‍ത്ത് അതോറിട്ടി മേധാവി ആര്‍.എസ്. ശര്‍മ്മ അറിയിച്ചു.
മിക്ക രാജ്യങ്ങളിലേക്കും ഇപ്പോള്‍ യാത്ര ചെയ്യണമെങ്കില്‍ 72 അല്ലെങ്കില്‍ 96 മണിക്കൂര്‍ മുമ്പായി എടുത്ത ആര്‍ടിപിസിആര്‍ പരിശോധന ഫലം നിര്‍ബന്ധമാണ്. ഈ സാഹചര്യത്തിലാണ് കോവിന്‍ പോര്‍ട്ടലിലും ഇതുകൂടി ഉള്‍പ്പെടുത്താന്‍ കേന്ദ്രം ഒരുങ്ങുന്നത്. ഡിജിറ്റല്‍ സിഗ്‌നേച്ചറോട് കൂടിയ ആര്‍ടിപിസിആര്‍ പരിശോധന ഫലം കോവിന്‍ സൈറ്റില്‍ നിന്ന് ഡൗണ്‍ലോഡ് ചെയ്യാന്‍ സാധിക്കും. നിലവില്‍ വാക്സിന്‍ സര്‍ട്ടിഫിക്കറ്റ് ലഭിക്കുന്നത് പോലെയുള്ള സംവിധാനമാണ് ആദ്യഘട്ടത്തില്‍ കേന്ദ്ര സര്‍ക്കാര്‍ ഒരുക്കുന്നതെന്നും ശര്‍മ്മ അറിയിച്ചു.
ഓരോ രാജ്യത്തിന്റേയും ഡിജിറ്റല്‍ വാക്സിനേഷന്‍ സര്‍ട്ടിഫിക്കറ്റ് ഒരു ഡിജിറ്റല്‍ പാസ്പോര്‍ട്ടായി അംഗീകരിക്കുന്നതിനായി അന്താരാഷ്‌ട്ര ഉടമ്പടി ഉണ്ടാക്കാനുള്ള നിരവധി ശ്രമങ്ങള്‍ നടന്നിരുന്നു. എന്നാല്‍ അത് ഫലവതായിട്ടില്ല. വിദേശയാത്രക്കാര്‍ക്കും പ്രവാസികള്‍ക്കും സൗകര്യപ്രദം എന്ന നിലയിലാണ് കോവിന്‍ പോര്‍ട്ടലില്‍ ഇപ്പോള്‍ ആര്‍ടിപിസിആര്‍ സര്‍്ട്ടിഫിക്കറ്റ് കൂടി ഉള്‍്‌പ്പെടുത്താന്‍ ഒരുങ്ങുന്ന്ത.
അതേസമയം പാസ്‌പോര്‍ട്ടിനൊപ്പം വാ്ക്‌സിനേഷന്‍ സര്‍ട്ടിഫിക്കറ്റ് കൂടി പരിഗണിക്കണമെന്ന ഉഭയകക്ഷി ചര്‍ച്ചകളും നടക്കുന്നുണ്ട്. ‘ഒരു രാജ്യം നമ്മുടെ വാക്സിന്‍ പാസ്പോര്‍ട്ട് അംഗീകരിക്കുന്നുണ്ടെങ്കില്‍ നമ്മള്‍ അവരുടേതും അംഗീകരിക്കും. അത്തരം രാജ്യങ്ങളിലെ വിദേശകാര്യ മന്ത്രാലയങ്ങള്‍ തമ്മില്‍ ചര്‍ച്ചകള്‍ നടത്തി വരികയാണ്. അന്താരാഷ്‌ട്ര നിലവാരത്തില്‍ തന്നെയാണ് ഇന്ത്യ വാക്സിന്‍ പാസ്പോര്‍ട്ട് സജ്ജീകരിച്ചിട്ടുള്ളത്. ക്യൂആര്‍ കോഡ് എന്‍ക്രിപ്റ്റ് ചെയ്തിരിക്കുന്ന വാക്സിനേഷന്‍ സര്‍ട്ടിഫിക്കറ്റില്‍ യഥാര്‍ത്ഥത്തില്‍ വേണ്ട എല്ലാ വിവരങ്ങളും ഉള്‍ക്കൊള്ളിച്ചിട്ടുണ്ട്. വ്യോമയാന മന്ത്രാലയവുമായും വിദേശകാര്യ മന്ത്രാലയവുമായും സഹകരിച്ചുകൊണ്ടാണ് പുതിയ മാറ്റം വരുത്തുന്നതെന്നും ശര്‍മ്മ കൂട്ടിച്ചേര്‍ത്തു.
