തിരുവനന്തപുരം : കോവിഡില്‍ സംസ്ഥാന സര്‍ക്കാരിന്റെ നിയന്ത്രണങ്ങള്‍ പാളിയിട്ടും ഇതുമായി ബന്ധപ്പെട്ട വിമര്‍ശനങ്ങളെ തള്ളി മുഖ്യമന്ത്രി പിണറായി വിജയന്‍. അനാവശ്യ വിവാദങ്ങള്‍ക്ക് ചെവി കൊടുത്ത് ഉത്തരവാദത്തില്‍ നിന്നും വീഴ്ച വരുത്താന്‍ സംസ്ഥാന സര്‍ക്കാര്‍ ആഗ്രഹിക്കുന്നില്ലെന്നും മുഖ്യമന്ത്രി അറിയിച്ചു. ചിന്ത വാരികയില്‍ പിണറായി എഴുതിയ ലേഖനത്തിലാണ് ഇക്കാര്യം അറിയിച്ചത്.
കോവിഡ് രണ്ടാം തരംഗം കേരളത്തില്‍ താമസിച്ചാണ് ആരംഭിച്ചത്. സംസ്ഥാനത്ത് രോഗബാധയേല്‍ക്കാന്‍ റിസ്‌ക് ഫാക്ടറുകള്‍ ഉള്ളവര്‍ ധാരാളമായി ഉണ്ട്. ഇതുസംബന്ധിച്ച് അറിയാതെയല്ല സംസ്ഥാന സര്‍ക്കാരിനെ വിമര്‍ശിക്കുന്നത്. കോവിഡ് പ്രതിരോധ പ്രവര്‍ത്തനങ്ങള്‍ക്ക് ജനങ്ങള്‍ നല്‍കി വരുന്ന അകമഴിഞ്ഞ സഹകരണത്തെ അട്ടിമറിച്ച് ആശയക്കുഴപ്പം സൃഷ്ടിക്കാനുള്ള ശ്രമമാണ് നടത്തുന്നത്. ജനവികാരം സര്‍ക്കാരിനെതിരാക്കാനും കോവിഡിനെതിരായുള്ള പോരാട്ടത്തെ പൊതുജനങ്ങള്‍ ലാഘവത്തോടെ കാണുന്ന സാഹചര്യം സൃഷ്ടിക്കാനുമുള്ള നീക്കങ്ങളാണ് ഇതെന്നും പിണറായി വിജയന്‍ ആരോപിച്ചു.
മറ്റ് സംസ്ഥാനങ്ങളിലെ കോവിഡ് വ്യാപന നിരക്ക് കുറഞ്ഞപ്പോഴും കേരളത്തില്‍ ഉയര്‍ന്ന് തന്നെയാണ്. രാജ്യത്തെ പ്രതിദിന കോവിഡ് രോഗികളുടെ എണ്ണത്തില്‍ 68 ശതമാനവും കേരളത്തിലാണ്. ഈ സാഹചര്യത്തില്‍ സംസ്ഥാന സര്‍ക്കാരിന്റെ നിയന്ത്രണങ്ങളില്‍ പാളീച്ച സംഭവിച്ചതായി രൂക്ഷ വിമര്‍ശനം ഉയര്‍ന്നിരുന്നു. ഇതുകൂടാതെ കേന്ദ്രസര്‍ക്കാര്‍ ഇതുമായി ബന്ധപ്പെട്ട് ഉന്നതതല യോഗം വിളിച്ചു ചേര്‍ക്കുകയും ചെയ്തിരുന്നു. ഓണാഘോഷത്തെ തുടര്‍ന്ന് കേരളത്തിലെ ലോക്ഡൗണ്‍ നിയന്ത്രണങ്ങളില്‍ ഇളവ് വരുത്തുന്നതിനെതിരെ വിമര്‍ശനള്‍ ഉയരുകയും ചെയ്തിരുന്നു. എന്നാല്‍ ഇതൊന്നും വകവെയ്‌ക്കാതെ നിയന്ത്രണങ്ങളില്‍ ഇളവ് വരുത്തിയതോടെയാണ് കോവിഡ് രോഗികളുടെ എണ്ണം സംസ്ഥാനത്ത് ക്രമാതീതമായി ഉയര്‍ന്നത്.
എന്നാല്‍ നിയന്ത്രണങ്ങളില്‍ പാളീച്ചയുണ്ടായിട്ടും അത് സമ്മതിക്കാതെ പ്രതിപക്ഷവും മറ്റും സംസ്ഥാന സര്‍ക്കാരിനെ അനാവശ്യമായി വിമര്‍ശിക്കുന്നതായി വരുത്തി തീര്‍ക്കാനാണ് മുഖ്യമന്ത്രിയുടെ ശ്രമം. രാജ്യത്തെ വന്‍നഗരങ്ങള്‍ കഴിഞ്ഞാല്‍ ഏറ്റവുമധികം ജനസാന്ദ്രതയുള്ള പ്രദേശമാണ് ഇത്. രോഗം വലിയ രീതിയില്‍ വ്യാപിച്ച വിദേശരാജ്യങ്ങളുമായി അഭേദ്യമായി ബന്ധപ്പെട്ടു കിടക്കുന്ന സംസ്ഥാനമാണ് കേരളം. മഹാമാരിക്കെതിരായുള്ള ഏറ്റവും ഫലപ്രദമായ പ്രതിരോധം സമ്പൂര്‍ണ്ണ വാക്സിനേഷന് ആണെന്നതും അതുറപ്പുവരുത്താനുള്ള ഉത്തരവാദിത്തം കേന്ദ്ര സര്‍ക്കാരിനാണ്. അറിയാവുന്നവര്‍ അതെല്ലാം മറച്ചുവച്ചുകൊണ്ട് ബോധപൂര്‍വ്വം ആശയക്കുഴപ്പം സൃഷ്ടിക്കുകയാണെന്നും മുഖ്യമന്ത്രി കുറ്റപ്പെടുത്തി.
