അടിമാലി: വനം വകുപ്പിന്റെ വിവാദ ഉത്തരവിന്റെ മറവില്‍ അടിമാലി റേഞ്ചില്‍ പെട്ട മച്ചിപ്ലാവ് ഫോറസ്റ്റ് സെക്ഷന്‍ പരിധിയില്‍ നടന്ന വ്യാപക മരം കൊള്ളയില്‍ മുന്‍ റേഞ്ചര്‍ ഒന്നാം പ്രതി. ഇത് സംബന്ധിച്ച് കഴിഞ്ഞ ദിവസം പിടികൂടിയ നാല് പ്രതികളുടെ റിമാന്‍ഡ് റിപ്പോര്‍ട്ടിന്റെ പകര്‍പ്പ് ജന്മഭൂമിക്ക് ലഭിച്ചു. അതേ സമയം റേഞ്ച് ഓഫീസര്‍ ജോജി ജോണിന്റെ അറസ്റ്റ് നീളുന്നതായി പരാതി വ്യാപകം.
ആനവിരട്ടി നടുത്തോട്ടത്തില്‍ റെജി(49), മച്ചിപ്ലാവ് മാറക്കര മത്തായി(64), മച്ചിപ്ലാവ് മറ്റത്തില്‍ സജി കുര്യക്കോസ്(49), ഊന്നുകല്‍ പുത്തന്‍കുരിശ് മൂലേത്തൊട്ടിയില്‍ ഷംസ്(48) എന്നിവരാണ് കേസിലെ മറ്റ് പ്രതികള്‍. ഇവരെ വെള്ളിയാഴ്ച ആണ് അടിമാലി പോലീസ് അറസ്റ്റ് ചെയ്തത്. വിവിധ സ്ഥലങ്ങളിലായുള്ള എല്‍എ പട്ടയഭൂമിയിലെ രാജകീയ മരങ്ങളാണ് കര്‍ഷകരെ അടക്കം പറഞ്ഞ് പറ്റിച്ച് പ്രതികള്‍ മുറിച്ച് വിറ്റത്.
മന്നാംകണ്ടം വില്ലേജ് ഓഫീസര്‍ സിന്ധു കെ.ഡി. അടിമാലി പോലീസിന് നല്‍കിയ പരാതിയെ തുടര്‍ന്നാണ് നടപടി വരുന്നത്. വിഷയത്തില്‍ ജില്ലാ പോലീസ് മേധാവി ഇടപ്പെട്ട് അടിമാലി എസ്എച്ച്ഒയുടെ നേതൃത്വത്തിലുള്ള സംഘത്തെ അന്വേഷണച്ചുമതല നല്‍കിയിരുന്നു. 2020 മാര്‍ച്ച് 11 മുതല്‍ 2021 ഫെബ്രുവരി രണ്ട് വരെയുള്ള കാലയളവില്‍ സംഘത്തിന്റെ നേതൃത്വത്തില്‍ ഈട്ടിയും തേക്കുമടക്കം കോടികള്‍ വിലമതിക്കുന്ന മരങ്ങളാണ് മുറിച്ച് കടത്തിയത്.
കേസിലെ ഒന്നാം പ്രതി വനസംരക്ഷണ വകുപ്പിലെ ഉത്തരവാദിത്വപ്പെട്ട ഉദ്യോഗസ്ഥനായിരിക്കെ ഭൂ സംരക്ഷണ നിയമത്തിന് വിപരീതമായി ഗവ. ഉത്തരവ് തെറ്റായി വ്യാഖ്യാനിച്ച് രാജകീയ ഗണത്തില്‍പ്പെട്ട മരങ്ങള്‍ മുറിക്കുന്നതിന് പാസ് നല്‍കുകയും മറ്റ് പ്രതികളുമായി ഗൂഡാലോചന നടത്തിയത് വ്യക്തമായതായും റിപ്പോര്‍ട്ടില്‍ പറയുന്നു. മറ്റ് വില്ലേജുകളിലും പരിശോധന നടത്തണമെന്നും റിപ്പോര്‍ട്ടില്‍ പറയുന്നു. മുറിച്ച് കടത്തിയ മരത്തിന്റെ കുറ്റയടക്കം കണ്ടെത്തിയാണ് കേസെടുത്തിരിക്കുന്നത്.
മരം മുറി കേസില്‍ നേരത്തെ തന്നെ റേഞ്ച് ഓഫീസറുടെ വലിയ തോതിലുള്ള ഇടപെടലുള്ളതായി കാട്ടി ജന്മഭൂമി നിരന്തരം വാര്‍ത്ത നല്‍കിയിരുന്നു. ഇതേ തുടര്‍ന്ന് കഴിഞ്ഞമാസമാണ് ഇയാളെ സ്ഥാനത്ത് നിന്ന് മാറ്റിയത്. കൊന്നത്തടി വില്ലേജിലും ഉത്തരവിന്റെ മറവില്‍ വ്യാപക മരം കൊള്ള നടന്നിട്ടുണ്ട്.
അതേസമയം കേസില്‍ റേഞ്ച് ഓഫീസറെ പ്രതി ചേര്‍ത്തിട്ടില്ലെന്നാണ് അടിമാലി എസ്എച്ചഒ ജന്മഭൂമിയോട് പറഞ്ഞത്. ഇയാളെ ചോദ്യം ചെയ്യുന്നതിനായി നാളെ വിളിപ്പിച്ചിട്ടുണ്ട്. ഇത് സംബന്ധിച്ച കത്തയച്ചതായും വിശദമായ വിവരങ്ങള്‍ അന്വേഷിച്ച് വരികയാണെന്നും അദ്ദേഹം പറഞ്ഞു.
