പന്തളം: തെരുവു നായകള്‍ വെട്ടേറ്റനിലയില്‍ അലയുന്നത് ജനങ്ങളെ പരിഭ്രാന്തിയിലാക്കുന്നു. തുമ്പമണ്‍, കടയ്‌ക്കാട് തുടങ്ങിയ പ്രദേശങ്ങളിലും പരിസരങ്ങളിലുമാണ് തെരുവുനായകളുടെ ചെവി, കഴുത്ത്, വയറ് എന്നിവിടങ്ങളില്‍ വെട്ടേറ്റ നിലയില്‍ കാണപ്പെട്ടത്.
മൂര്‍ച്ചയേറിയ ആയുധം ഉപയോഗിച്ച് വെട്ടിയ രീതിയിലാണ് മുറിവുകള്‍ കാണപ്പെടുന്നത്. ഇത് ജനങ്ങളില്‍ ആശങ്ക ഉയര്‍ത്തുന്നു. മുറിവുകള്‍ വ്രണമായി മാറുകയും അവശനിലയിലായി നായകള്‍ ചത്തൊടുങ്ങുന്നതായാണ് കണ്ടുവരുന്നത്. പ്രദേശത്ത് ഇത്തരം സംഭവം ആദ്യമായാണ് ജനങ്ങളുടെ ശ്രദ്ധയില്‍പ്പെടുന്നത്. എന്നാല്‍ സംസ്ഥാനത്ത് മറ്റു ചിലയിടങ്ങളില്‍ ഇതിനു സമാനമായ സംഭവങ്ങള്‍ റിപ്പോര്‍ട്ട് ചെയ്തിരുന്നു.
ചില തീവ്രവാദ സംഘടനകള്‍ നായകളെയും മറ്റും വെട്ടിപ്പരിക്കേല്‍പ്പിച്ച് ആയുധപരിശീലനം നടത്തുന്നതായും വാര്‍ത്തകള്‍ വന്നിരുന്നു. ഇതിനു സമാനമാണ് ഇവിടെയും നടക്കുന്നതെന്നത് നാട്ടുകാരെ ആശങ്കയിലാക്കുന്നു. കൂടുതല്‍ നായകള്‍ക്ക് വെട്ടേറ്റതോടെ ജനങ്ങള്‍ കൂടുതല്‍ പരിഭ്രാന്തിയിലാണ്. ഇതിനു പിന്നില്‍ തീവ്രവാദ സംഘടനാ ബന്ധം ഉണ്ടോ എന്ന് പോലീസ് അന്വേഷിക്കണമെന്നാണ് നാട്ടുകാരുടെ ആവശ്യം.
മുറിവ് പഴുത്ത നിലയില്‍ അലയുന്ന നായകള്‍ വലിയ ആരോഗ്യ ഭീഷണിയും ഉയര്‍ത്തുന്നു.
