കൊച്ചി : നടിയെ ആക്രമിച്ച കേസിലെ മാപ്പു സാക്ഷി വിഷ്ണുവിനെതിരെ ജാമ്യമില്ലാ വാറണ്ട് പുറപ്പെടുവിച്ചു. കേസ് വിചാരണയ്ക്ക് തുടര്‍ച്ചയായി ഹാജരാകാതിരുന്നതിനെ തുടര്‍ന്നാണ് നടപടി. കേസിലെ പത്താം പ്രതിയാണ് വിഷ്ണു. ഇന്ന് ഹാജരാകാനാണ് വാറണ്ട് പുറപ്പെടുവിച്ചിരിക്കുന്നത്.
വിഷ്ണുവിനോട് കഴിഞ്ഞ ബുധനാഴ്ച വിചാരണയ്‌ക്കായി ഹാജരാകാന്‍ ആവശ്യപ്പെട്ടിരുന്നതാണ്. എന്നാല്‍ എത്താത്തതിനെ തുടര്‍ന്നാണ് ഇപ്പോള്‍ ജാമ്യമില്ലാ വാറണ്ട് പുറപ്പെടുവിച്ചിരിക്കുന്നത്. നടിയെ ആക്രമിച്ച കേസില്‍ നിലവില്‍ വിചാരണ നടന്നുകൊണ്ടിരിക്കുകയാണ്. വിചാരണ ഓഗസ്റ്റില്‍ തീരേണ്ടതാണ്. എന്നാല്‍ കോവിഡ് ഉള്‍പ്പെടെയുള്ള പ്രതിസന്ധികള്‍ മൂലം വിചാരണ നീണ്ടുപോവുകയായിരുന്നു.
അതേസമയം നിലവിലെ സാഹചര്യങ്ങളില്‍ കേസ് വിചാരണ പൂര്‍ത്തിയാക്കാന്‍ കൂടുതല്‍ സമയം നല്‍കണമെന്നും ആവശ്യപ്പെട്ട് വിചാരണ കോടതി ജഡ്ജി സുപ്രീംകോടതിയെ സമീപിച്ചിട്ടുണ്ട്.
ആകെ നൂറ്റി നാല്‍പത് സാക്ഷികള്‍ ഉള്ള കേസില്‍ എണ്‍പത് പേരെ ഇതിനോടകം വിസ്തരിച്ചു കഴിഞ്ഞു. ഇതിന്റെ ഭാഗമായാണ് വിഷ്ണുവിനോടും ഹാജരാകാന്‍ ആവശ്യപ്പെട്ടത്. എന്നാല്‍ ഇയാള്‍ ഒഴിഞ്ഞുമാറുകയായിരുന്നു. ദിലീപില്‍ നിന്ന് പണം ആവശ്യപ്പെട്ട് ഒന്നാം പ്രതി സുനില്‍ ജയില്‍ നിന്ന് അയച്ച കത്ത് എഴുതിയത് വിഷ്ണുവായിരുന്നു. ഇയാള്‍ പിന്നീട് മാപ്പുസാക്ഷിയാവുകയായിരുന്നു.
