കൊല്ക്കത്ത: നന്ദിഗ്രാമില് ബിജെപി നേതാവ് സുവേന്ദു അധികാരിയുടെ തെരഞ്ഞെടുപ്പ് വിജയത്തിനെതിരേ ബംഗാള് മുഖ്യമന്ത്രി മമത ബാനര്ജി സമര്പ്പിച്ച ഹര്ജി പരിഗണിക്കവേ കോടതിയില് നാടകീയ രംഗങ്ങള്. നന്ദിഗ്രാമില് ബിജെപി നേതാവ് സുവേന്ദു അധികാരി തിരഞ്ഞെടുപ്പ് വിജയത്തിനെതിരായ കേസ് പരിഗണിക്കുന്നതില് നിന്ന് ജസ്റ്റിസ് കൗശിക് ചന്ദയെ നീക്കം ചെയ്യണമെന്ന് കോടതിയില് അപ്പീല് നല്കിയതിന് പശ്ചിമ ബംഗാള് മുഖ്യമന്ത്രി മമത ബാനര്ജിക്ക് ഹൈക്കോടതി അഞ്ച് ലക്ഷം രൂപ പിഴ ചുമത്തി. തുടര്ന്ന് വിവേചനാധികാരത്തില് ചന്ദ കേസില് നിന്ന് പിന്മാറി.
ജസ്റ്റിസ് ചന്ദയെ പലപ്പോഴും ബിജെപി നേതാക്കളുമായി കണ്ടിട്ടുണ്ടെന്നും ജഡ്ജിക്ക് ബിജെപി ബന്ധമുണ്ടെന്നും ആരോപിച്ച ജസ്റ്റിസ് കൗശിക് ചന്ദയുടെ ബെഞ്ചില് നിന്ന് കേസ് കൈമാറണമെന്ന് മമത ബാനര്ജിയുടെ അഭിഭാഷകന് അപ്പീല് നല്കിയിരുന്നു. ആദ്യം കേസ് പരിഗണിച്ചപ്പോള് ഇത്തരം ഒരു ആവശ്യം തൃണമൂലുകാര് മുന്നോട്ടു വച്ചില്ലെന്നും പിന്നീട് ബിജെപി നേതാക്കളുമായി നില്ക്കുന്ന ചിത്രങ്ങള് ഉണ്ടാക്കി ട്വിറ്റരില് പ്രചരിപ്പിച്ചെന്നും കൗശിക് ചന്ദ പറഞ്ഞു. മമതയുടെ ഹര്ജി അംഗീകരിക്കില്ലെന്നും കേസ് കേള്ക്കാന് തനിക്ക് അധികാരമുണ്ടെന്നും വ്യക്തമാക്കിയെങ്കിലും സ്വന്തം വിവേചനാധികാരത്തില് ഇനി ഈ കേസ് കേള്ക്കില്ലെന്ന് കൗശിക് ചന്ദ വ്യക്തമാക്കുകയായിരുന്നു. ഇത്തരത്തില് രാഷ്ട്രീയമായി ജഡ്ജിമാരെ വിലയിരുത്തുന്നത് നല്ല പ്രവണതയെല്ലെന്നും അദ്ദേഹം പറഞ്ഞു.
