കോട്ടയം: പ്ലാന്റേഷന് കോര്പ്പറേഷന് എംഡിക്കെതിരെ കോര്പ്പറേഷനിലെ ജീവനക്കാരിയുടെ പരാതി. എംഡി ബി. പ്രമോദിന് എതിരെയാണ് ജീവനക്കാരി ജില്ലാ പോലീസ് മേധാവി ഡി. ശില്പക്ക് പരാതി നല്കിയത്. കോട്ടയം ഈസ്റ്റ് പോലീസ് എഫ്ഐആര് ഇട്ട് കേസ് രജിസ്റ്റര് ചെയ്തു.
ഐപിസി 364 എ വകുപ്പ് പ്രകാരമാണ് കേസ് എടുത്തിരിക്കുന്നത്. 2020 മുതല് എംഡി ലൈംഗിക താല്പര്യത്തോടെ ഇടപെടല് നടത്തിയെന്ന് പരാതിയില് പറയുന്നു. എംഡിയുടെ മുറിയില്വെച്ച് ലൈംഗിക താല്പര്യത്തോടെ ശരീരത്തില് സ്പര്ശിച്ചു, ലൈംഗിക ചുവയോടെ സംസാരിച്ചു. തന്റെ താല്പര്യത്തിന് വഴങ്ങിയില്ലെങ്കില് സ്ഥാപനത്തില് നിന്ന് പുറത്താക്കുമെന്നും എംഡി ഭീഷണിപ്പെടുത്തിയതായും പരാതിയിലുണ്ട്.
അവഹേളനം തുടര്ന്നതോടെ സ്ഥാപനത്തിലെ ആഭ്യന്തര സമിതിക്ക് പരാതി നല്കി. എംഡിക്കെതിരെയുള്ള പരാതിയായതിനാല് കളക്ടറേറ്റ് സെല്ലിലേക്ക് കൈമാറുകയായിരുന്നു. തുടര്ന്ന് മെയ് മൂന്നിന് ഓഫീസില് എത്തിയപ്പോള് ജോലിയില് പ്രവേശിക്കുന്നത് തടഞ്ഞു. മാനഹാനി കരുതിയാണ് ഇതുവരെ പരാതി നല്കാതിരുന്നതെന്നും പരാതിയിലുണ്ട്.
