ജനീവ: സമ്പന്ന രാജ്യങ്ങളിലെല്ലാം തന്നെ വാക്സിനേഷന് വ്യാപകമാക്കിയപ്പോള് വാക്സിന് കിട്ടാനില്ലാതെ വലയുകയാണ് പാവപ്പെട്ട രാഷ്ട്രങ്ങള്. ഇവിടങ്ങളിലേക്ക് വാക്സിന് ആവശ്യപ്പെട്ട് ലോകാരോഗ്യ സംഘടന.
മിക്ക രാജ്യങ്ങളിലും 18ന് മുകളിലുള്ളവര്ക്ക് വാക്സിന് നല്കിത്തുടങ്ങിയതോടെയാണ് പാവപ്പെട്ട രാഷ്ട്രങ്ങളിലെ സ്ഥിതി വഷളായത്. വാക്സിനേഷന് പ്രക്രിയ നിലച്ചതോടെ വ്യാപനവും വര്ധിക്കുകയാണ് ഇവിടങ്ങളില്. കഴിഞ്ഞ ഒരാഴ്ചയ്ക്കുള്ളില് ദക്ഷിണാഫ്രിക്കയില് കൊവിഡ് മൂലം മരിച്ചവരുടെ എണ്ണം 40 ശതമാനമാണ് വര്ധിച്ചത്. വൈറസിന്റെ പുതിയ വകഭേദമായ ഡെല്റ്റ പ്ലസിന്റെയും വ്യാപനവും രൂക്ഷമാണ്.
നിലവിലെ സ്ഥിതി വളരെ അപകടകരമാണെന്നാണ് സംഘടനാ തലവന് ടെഡ്രോസ് അഥനോം ഗബ്രയേസസ് പറഞ്ഞത്. ആഗോള സമൂഹമെന്ന നിലയില് നമ്മുടെ ലോകം പരാജയപ്പെടുകയാണെന്നാണ് വാക്സിന് ലഭ്യതക്കുറവില് അദ്ദേഹം പ്രതികരിച്ചത്. പല രാജ്യങ്ങളും വരുമാനം കുറവുള്ള രാജ്യങ്ങളുമായി വാക്സിന് പങ്കിടാന് വിമുഖത കാണിക്കുകയാണ്. ആഫ്രിക്ക പോലുള്ള രാജ്യങ്ങള്ക്ക് സങ്കീര്ണമായ ചികിത്സാ രീതികള് പ്രായോഗികമാക്കാന് കഴിയില്ലെന്ന വാദത്തെ അഥനോം എയ്ഡ്സ്/എച്ച്ഐവി പ്രതിസന്ധിയുമായി താരതമ്യപ്പെടുത്തുകയും ചെയ്തു. പ്രശ്നം വാക്സിന് വിതരണമാണ്. ഞങ്ങള്ക്ക് വാക്സിന് നല്കണം. അതിന് വാക്സിന് വേണം, അഥനോം പറഞ്ഞു.
കോളറ, പോളിയോ തുടങ്ങിയവയ്ക്കുള്ള പ്രതിരോധ കുത്തിവയ്പ്പിന്റെ കാര്യത്തില് വ്യവസായിക രാഷ്ട്രങ്ങളേക്കാള് മികച്ചത് വികസ്വര രാഷ്ട്രങ്ങളാണെന്ന് സംഘടനയിലെ അംഗമായ മൈക്ക് റയാന് പറഞ്ഞു. പാവപ്പെട്ട രാജ്യങ്ങള്ക്ക് വാക്സിന് ലഭ്യത ഉറപ്പാക്കാനായി ലോകാരോഗ്യ സംഘടനയും വാക്സിന് നിര്മാതാക്കളായ ഗവിയും ചേര്ന്നാരംഭിച്ചതാണ് കൊവാക്സ് പദ്ധതി. ഫെബ്രുവരി മുതല് ഇതുവരെ 90 ദശലക്ഷം വാക്സിന് ഡോസുകളാണ് കൊവാക്സ് വഴി 132 രാജ്യങ്ങളിലേക്ക് വിതരണം ചെയ്തത്. എന്നാല്, ഇന്ത്യ വാക്സിന് കയറ്റുമതി നിര്ത്തിവച്ചതോടെയാണ് വിതരണത്തില് പ്രതിസന്ധി നേരിടാന് തുടങ്ങിയത്.
ഈ മാസം ഒറ്റ ഡോസ് വാക്സിന് പോലും കൊവാക്സിലൂടെ വിതരണം ചെയ്യാന് കഴിഞ്ഞിട്ടില്ലെന്ന് സംഘടനയുടെ ഉപദേശകന് ബ്രൂസ് ഐല്വാര്ഡ് അറിയിച്ചു. നിലവിലെ സാഹചര്യം വളരെ ദയനീയമാണെന്നും അദ്ദേഹം കൂട്ടിച്ചേര്ത്തു
