ന്യൂദല്ഹി: വീഡിയോ വൈറലാകുന്നതിന് സ്വന്തം വളര്ത്തുനായയെ ബലൂണില് കെട്ടി പറപ്പിച്ച യൂട്യൂബര് അറസ്റ്റില്. ദല്ഹി സ്വദേശി ഗൗരവ് ജോണ് ആണ് അറസ്റ്റിലായത്. കുറച്ച് ഹൈഡ്രജന് ബലൂണുകള് തന്റെ നായയുടെ ശരീരത്തില് കെട്ടിയ ശേഷം ഗൗരവ് കൊണ്ടുവരുന്നതാണ് ആദ്യം വീഡിയോയിലുളളത്. തുടര്ന്ന് ഒരു പാര്ക്കില് വച്ച് നായയെ വിടുന്നു. ഇതോടെ പറന്ന് പൊങ്ങിയ നായ കരയുന്നത് വീഡിയോയിലുണ്ട്.
പീപ്പിള് ഫോര് ആനിമല് എന്ന സംഘടമ മാള്വിയ നഗര് പൊലീസ് സ്റ്റേഷനില് പരാതി നല്കിയതിനെ തുടര്ന്ന് പോലീസ് ഗൗരവിനെ അറസ്റ്റ് ചെയ്തു. നായ പറക്കുന്നത് കണ്ട് യൂട്യൂബറും ഇയാളുടെ അമ്മയും സന്തോഷിക്കുന്നുമുണ്ട്. സംഭവത്തില് മൃഗസ്നേഹി സംഘടനകള് പരാതി നല്കിയതിനെ തുടര്ന്ന് യൂട്യൂബ് വീഡിയോ നീക്കം ചെയ്തു.
വിവാദ വീഡിയോ ഡിലീറ്റ് ചെയ്ത ശേഷം താന് നായയെ സുരക്ഷിതമായി താഴെയിറക്കാന് വേണ്ട എല്ലാ കാര്യങ്ങളും ചെയ്തിരുന്നതായി ചൂണ്ടിക്കാട്ടി ഗൗരവ് ഒരു വീഡിയോ കൂടി പോസ്റ്റ് ചെയ്തിരുന്നു. ‘ഡോളര്’ എന്ന തന്റെ നായയോട് അങ്ങനെ ചെയ്തതില് ഗൗരവ് മാപ്പുപറയുകയും ചെയ്തു.
