കാസര്കോട്: ജനറല് ആശുപതിയിലെ സെക്യുരിറ്റി ജീവനക്കാരനെ താക്കോല് കൊണ്ട് കുത്തി പരിക്കേല്പിച്ചു. നീലേശ്വരം സ്വദേശി ശ്രീധരനാ (50)ണ് വലതുഭാഗത്തെ ചവിക്ക് സമീപം കുത്തേറ്റത്. വ്യാഴാഴ്ച രാത്രി ഒമ്പതോടെയാണ് സംഭവമെന്ന് ശ്രീധരന് പറഞ്ഞു.
പ്രസവ ശുശ്രുഷയ്ക്ക് വന്ന സ്ത്രീയെ കാണാന് എത്തിയ ഒരു സ്ത്രീയും കൂടെ യുവാവുമുണ്ടായിരുന്നു. കാര്യങ്ങള് അന്വേഷിച്ചപ്പോള് പ്രസവ വാര്ഡില് പോകണമെന്ന് ആവശ്യപ്പെടുകയായിരുന്നു. കൊറോണ നഗറ്റീവ് സര്ട്ടിഫിക്കറ്റ് ആവശ്യപ്പെട്ടപ്പോള് സ്ത്രീ സര്ട്ടിഫിക്കറ്റ് കാണിച്ചതോടെ കടത്തിവിടുകയായിരുന്നു. സ്ത്രീയോടൊപ്പം യുവാവ് പോകാന് ശ്രമിച്ചത് തടയാന് ശ്രമിച്ചപ്പോള് യുവാവ് പ്രകോപിതനാവുകയും കൈയ്യില് തിരുകിയ താക്കോല് മുഖത്തടിക്കുകയും ചെവിക്ക് കുത്തി പരിക്കേല്പിക്കുകയുമായിരുന്നു.
ചെവിയില് നിന്ന് ചോര വന്നതോടെ യുവാവ് രക്ഷപ്പെടാന് ശ്രമിക്കുന്നതിനിടെ അവിടെയുണ്ടായിരുന്നവര് പിടികൂടി പോലീസില് ഏല്പിക്കുകയുമായിരുന്നു. ആശുപത്രിയില് നേരത്തേ എയ്ഡ് പോസ്റ്റ് ഉണ്ടായിരുന്നു.ഇത് പിന്വലിച്ചതോടെ സാമൂഹ്യ ദ്രോഹികള് ആശുപത്രിയിലെ ഡോക്ടര്മാര്ക്കും ജീവനക്കാര്ക്കുമെതിരെ തട്ടിക്കയറുന്നതും ഭീഷണിപ്പെടുത്തുന്നതും പതിവായിട്ടുണ്ട്.
