വെഞ്ഞാറമൂട്: പെട്രോള്‍ പമ്പുകളില്‍ പെട്രോളിയും ലൈസന്‍സ് നിയമ ലംഘനം വ്യാപകമാകുന്നു. നിയമപ്രകാരം നിരോധിച്ചിട്ടുണ്ടെങ്കിലും വാഹനങ്ങളില്‍ പെട്രോള്‍ നിറയ്ക്കുന്ന ജീവനക്കാര്‍ മൊബൈല്‍ ഉപയോഗിച്ച് അശ്രദ്ധമായാണ് പെട്രോള്‍ കൈകാര്യം ചെയ്യുന്നത്. ജീവനക്കാരുടെ അശ്രദ്ധ വന്‍ അത്യാഹിതത്തിന് വഴിവച്ചേക്കുമെന്നാണ് നാട്ടുകാരുടെ ഭീതി.
സുരക്ഷാ മാനദണ്ഡങ്ങള്‍ പൂര്‍ണമായും കാറ്റില്‍പ്പറത്തിയാണ് പ്രവര്‍ത്തനം. വാഹനം എഞ്ചിന്‍ ഓഫ് ആക്കാതെ പെട്രോള്‍ അടിക്കുകയും ഈ സമയം ഒരു കൈയില്‍ മൊബൈല്‍ ഫോണില്‍ സംസാരിക്കുന്നതും പതിവാണ്. വാഹനത്തിലോ പെട്രോള്‍ നിറയ്‌ക്കുന്നതിലോ ശ്രദ്ധിക്കാതെയാണ് ജീവനക്കാരുടെ ഗുരുതരമായ അലംഭാവം.
പെട്രോള്‍ പമ്പിലെ ജോലി സമയത്ത് നിയമപരമായി വിലക്കുള്ള പരിധിയില്‍ മൊബൈല്‍ ഉപയോഗിക്കുന്ന ജീവനക്കാരെ പമ്പ് മാനേജ്‌മെന്റിന് കര്‍ശനമായി വിലക്കേണ്ടതും കുറ്റം ആവര്‍ത്തിച്ചാല്‍ പിരിച്ചുവിടല്‍ ഉള്‍പ്പെടെയുള്ള ശിക്ഷാ നടപടികള്‍ സ്വീകരിക്കേണ്ടതുമാണെങ്കിലും ഇതെല്ലാം അവഗണിക്കപ്പെടുകയാണ്.
ഇങ്ങനെയുള്ള ജീവനക്കാരെ പെട്രോളിയം കമ്പനികളുടെ സുരക്ഷാ നിയമപ്രകാരം ജോലിയില്‍ നിന്നും ഉടനടി പിരിച്ചുവിടാന്‍ വ്യവസ്ഥയുണ്ടെങ്കിലും നടപ്പാക്കുന്നില്ല.
നിയമലംഘനത്തിന് കൂട്ടുനില്‍ക്കുന്ന പമ്പ് ഉടമസ്ഥര്‍ക്കെതിരെയുള്ള പെട്രോളിയം ആന്‍ഡ് എക്‌സ്‌പ്ലോസീവ്‌സ് സേഫ്റ്റി ഓര്‍ഗനൈസേഷന്‍ (പിഇഎസ്ഒ) നിയമപ്രകാരം കടുത്ത നടപടികള്‍ പെട്രോളിയം കമ്പനികള്‍ സ്വകരിക്കേണ്ടതുണ്ട്. സുരക്ഷാ മാനദണ്ഡങ്ങള്‍ ലംഘിക്കുന്നതായി കണ്ടാല്‍ പമ്പിന്റെ പ്രവര്‍ത്തന ലൈസന്‍സ് താല്‍ക്കാലികമായോ സ്ഥിരമായോ റദ്ദാക്കല്‍, ഇന്ധന വിതരണം നിര്‍ത്തലാക്കല്‍, കനത്ത തുക പിഴ ഈടാക്കല്‍ എന്നിവ കൂടാതെ മറ്റ് നിയമനടപടികളും സ്വീകരിക്കാന്‍ പെട്രോളിയം കമ്പനികള്‍ക്ക് അധികാരമുണ്ടെങ്കിലും ഇതെല്ലാം അവഗണിക്കപ്പെടുന്നത് ഗുരുതരമായ അപകടം ക്ഷണിച്ചുവരുത്തലാകുമെന്നാണ് വിലയിരുത്തല്‍.
ബന്ധപ്പെട്ട അധികൃതര്‍ കര്‍ശനമായ നടപടി സ്വീകരിക്കണമെന്നാണ് പമ്പിനു സമീപം താമസിക്കുന്നവരും കച്ചവടക്കാരും ആവശ്യപ്പെടുന്നത്.
ജന്മഭൂമി ഓണ്‍ലൈന്‍