തിരുവനന്തപുരം :പോലീസ് തന്നെ അവഗണിച്ചെന്ന പരാതിയുമായി മുൻ സംസ്ഥാന പോലീസ് മേധാവി ആർ. ശ്രീലേഖ. മ്യൂസിയം പോലീസിനെതിരെയാണ് ശ്രീലേഖ പരാതി ഉന്നയിച്ചിരിക്കുന്നത്. സാമ്പത്തിക തട്ടിപ്പിന് ഇരയായി നൽകിയ പരാതിയിൽ പോലീസ് ഇതുവരെ യാതൊരു നടപടിയും സ്വീകരിച്ചില്ലെന്ന് ശ്രീലേഖ പറഞ്ഞു.
പരാതി ഇ മെയിലിൽ നൽകിയിട്ടും നേരിട്ട് വിളിച്ച് പറഞ്ഞിട്ടും മ്യൂസിയം പൊലീസ് തിരിഞ്ഞ് നോക്കിയില്ലെന്ന് മുൻ ഡിജിപി പരാതിപ്പെടുന്നു. ഫേസ്ബുക്ക് പോസ്റ്റിലൂടെയാണ് ശ്രീലേഖയുടെ വെളിപ്പെടുത്തൽ.
സംഭവത്തിൽ നാല് തവണയാണ് പരാതിയുമായി മ്യൂസിയം പോലീസിനെ സമീപിച്ചത്. എന്നാൽ അവഗണിച്ചു. തന്റെ അനുഭവം ഇതാണെങ്കിൽ സ്റ്റേഷൻ പരിധിയിൽ ജീവിക്കുന്ന സാധാരണക്കാരുടെ അവസ്ഥ എന്തായിരിക്കുമെന്നും ശ്രീലേഖ ചോദിക്കുന്നു. ഓൺലൈനിൽ പറ്റിക്കപ്പെട്ടതുമായി ബന്ധപ്പെട്ടാണ് ശ്രീലേഖ പരാതി നൽകിയത്.
അതേസമയം ശ്രീലേഖയുടെ ആരോപണം അടിസ്ഥാന രഹിതമാണെന്ന് മ്യൂസിയം പോലീസ് പ്രതികരിച്ചു. ഇമെയിലായി പരാതി അയച്ചെന്ന് ശ്രീലേഖ അറിയിച്ചിരുന്നു. എന്നാൽ ഇതുവരെ ലഭിച്ചിട്ടില്ലെന്നും പോലീസ് അറിയിച്ചു.
