കൃഷ്ണഗിരി: എതിര്‍പ്പ് മറികടന്ന് വിവാഹം കഴിച്ചതുമായി ബന്ധപ്പെട്ട തര്‍ക്കത്തിനിടെ അച്ഛൻ ഗര്‍ഭിണിയായ മകളെ വെടിവെച്ച്‌ കൊന്നു. അമ്മയെ രക്ഷിക്കാനുള്ള ശ്രമത്തിനിടെയാണ് മകൾക്ക് വെടിയേറ്റത്. നാലു മാസം ഗര്‍ഭിണിയായ വെങ്കിടാലക്ഷ്മി എന്ന യുവതിയാണ് വെടിയേറ്റ് മരിച്ചത്. ഇവരുടെ വയറിലാണ് വെടിയേറ്റത്. പിതാവ് അരുണാചലത്തെ പോലീസ് അറസ്റ്റ് ചെയ്തു.
കൃഷ്ണഗിരി തേന്‍കനികോട്ടയിലാണ് നാടിനെ നടുക്കിയ സംഭവം നടന്നത്. മാസങ്ങള്‍ക്ക് മുമ്പായിരുനു വെങ്കിടാലക്ഷ്മിയുടെ വിവാഹം. അച്ഛന്‍ അരുണാചലത്തിന്റെ എതിര്‍പ്പിനിടെയായിരുന്നു സാമ്പത്തികമായി പിന്നാക്കം നില്‍ക്കുന്ന കുടുംബത്തിലെ യുവാവിനെ വിവാഹം ചെയ്തത്. അമ്മാവന്റെയും മറ്റു കുടുംബാംഗങ്ങളുടെയും പിന്തുണ വെങ്കിടാലക്ഷ്മിക്കുണ്ടായിരുന്നു. ഇതിന്റെ പേരില്‍ വീട്ടില്‍ തര്‍ക്കം പതിവായിരുന്നു.
രണ്ടാഴ്ച മുമ്പാണ് വിശ്രമത്തിനായി വെങ്കിടാലക്ഷ്മി സ്വന്തം വീട്ടില്‍ തിരിച്ചെത്തിയത്. കഴിഞ്ഞ ദിവസം മകളുടെ വിവാഹത്തിന്റെ പേരില്‍ തര്‍ക്കം ആരംഭിക്കുകയും അരുണാചലം ഭാര്യയെ മര്‍ദിക്കുകയും ചെയ്തു. മര്‍ദിക്കുന്നതിനിടെ വീട്ടിലുണ്ടായിരുന്ന നാടന്‍ തോക്കെടുത്ത് ഭാര്യക്ക് നേരെ ചൂണ്ടി. ഈ സമയം അമ്മയെ രക്ഷിക്കാന്‍ വെങ്കിടാലക്ഷ്മി ശ്രമിച്ചപ്പോള്‍ അരുണാചലം നിറയൊഴിക്കുകയായിരുന്നു. കരച്ചില്‍ കേട്ടെത്തിയ പ്രദേശിവാസികള്‍ യുവതിയെ ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു.
സംഭവ ശേഷം അരുണാചലം ഒളിവില്‍ പോയി. എന്നാല്‍, മണിക്കൂറുകള്‍ക്കകം കൃഷ്ണഗിരി അതിര്‍ത്തിയിലെ ഫാം ഹൗസില്‍നിന്ന് അരുണാചലത്തെ പോലീസ് അറസ്റ്റ് ചെയ്യുകയായിരുന്നു.
