കാസര്‍ഗോഡ്: ശബരിമല വിഷയത്തില്‍ എകെ ആന്റണി മുതലക്കണ്ണീര്‍ ഒഴുക്കുകയാണെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. ശബരിമല പ്രക്ഷോഭം നടക്കുമ്പോള്‍ കേരളത്തിലേക്ക് തിരിഞ്ഞു പോലും നോക്കാത്തയാളാണ് എകെ ആന്റണി. മുഖ്യമന്ത്രി ശബരിമലയെ കുറിച്ച് നടത്തിയ പ്രസ്താവന അദേഹത്തിന്റെ ദൗര്‍ബല്യമാണ് കാണിക്കുന്നതെന്നും സുരേന്ദ്രന്‍ കാസര്‍ഗോഡ് മാധ്യമങ്ങളോട് പറഞ്ഞു.
വിശ്വാസികളുടെ പ്രശ്‌നത്തില്‍ ഇടപെടാതെ എകെ ആന്റണിയും ഉമ്മന്‍ ചാണ്ടിയും കുറ്റകരമായ മൗനം പാലിച്ചവരാണെന്നും സുരേന്ദ്രന്‍ വിമര്‍ശിച്ചു. സര്‍ക്കാരിന്റെ സംവിധാനം ഉപയോഗിച്ചാണ് അവിശ്വാസികളായ മനീതി സംഘത്തെ ഉള്‍പ്പെടെ ശബരിമലയിലേക്ക് അയച്ചത്. സര്‍ക്കാരിന്റെ ആബുലന്‍സില്‍ പൊലീസ് അകമ്പടിയിലാണ് അര്‍ദ്ധരാത്രി യുവതികളെ കയറ്റിയത്. ഇനിയും ഹര്‍ത്താല്‍ നടത്തുന്നില്ലേയെന്ന് യുവതീ പ്രവേശനത്തിന് ശേഷം വിശ്വാസികളെ വെല്ലുവിളിച്ചയാളാണ് പിണറായി വിജയനെന്നും സുരേന്ദ്രന്‍ പറഞ്ഞു.
തെരഞ്ഞെടുപ്പ് ദിനത്തില്‍ രാവിലെ മുതല്‍ അയ്യപ്പനെ പരാമര്‍ശിച്ചായിരുന്നു പ്രമുഖ നേതാക്കളുടെ പ്രതികരണം. അയ്യപ്പന്‍ എല്‍ഡിഎഫിനൊപ്പമെന്ന് മുഖ്യമന്ത്രി പിണറായി വിജയനും അദേഹത്തിന് അയ്യപ്പശാപം ലഭിക്കുമെന്ന് പ്രതിപക്ഷ നേതാവും പറഞ്ഞു. വിശ്വസികള്‍ക്കിടയില്‍ പ്രതിഷേധം ഉയരുന്നുണ്ടെന്നായിരുന്നു എന്‍എസ്എസ് ജനറല്‍ സെക്രട്ടറി ജി.സുകുമാരന്‍ നായരുടെ പ്രതികരണം.
