ശ്രീനഗര്: ജമ്മുകാശ്മീരില് ഭീകരസംഘടനയായ ലഷ്കര്-ഇ-തയിബയുമായി ബന്ധമുള്ള രണ്ടുപേരെ അറസ്റ്റ് ചെയ്തു. ഗ്രനേഡ് സ്ഫോടന കേസുമായി ബന്ധപ്പെട്ടാണ് ബാരാമുള്ള ജില്ലയിലെ സോപോര് പ്രദേശത്തുവച്ച് ഇരുവരും പിടിയിലായതെന്ന് പൊലീസ് അറിയിച്ചു. വടക്കന് കാശ്മീരിലെ സോപോറിലെ പോലീസ് പോസ്റ്റ് ബസ്റ്റാന്റിന്റെ ഗേറ്റിന് പുറത്തു നടന്ന ഗ്രനേഡ് സ്ഫോടനത്തില് മൂന്ന് പേര്ക്ക് പരിക്കേറ്റിരുന്നു.
കേസില് അന്വേഷണം തുടരുന്നതിനിടെയാണ് നൂര് ബാഖ് സ്വദേശിയായ മുഹമ്മദ് ആസിഫ് നജാര്, ഗ്രീന് ടൗണ് സ്വദേശിയായ സഹില് റാഷിദ് ഭട്ട് എന്നിവരെ അറസ്റ്റ് ചെയ്തത്. ലഷ്കര്-ഇ-തയിബയ്ക്കുവേണ്ടി പ്രാദേശിക തലത്തില് പ്രവര്ത്തിക്കുകയായിരുന്നുവെന്ന് ഇവര് ചോദ്യം ചെയ്യലില് സമ്മതിച്ചു. പൊലീസ് പോസ്റ്റിന് നേരെ നേരത്തേ ഗ്രനേഡ് എറിഞ്ഞിട്ടുണ്ട്. കൂടുതല് അന്വേഷണം നടത്തുമെന്ന് പൊലീസ് അറിയിച്ചു.
