ന്യൂദല്ഹി: പൊതുജീവിതത്തില് മൂല്യങ്ങള് ഉയര്ത്തിപ്പിടിക്കാന് ഉപരാഷ്ട്രപതി എം വെങ്കയ്യ നായിഡു ആഹ്വാനം ചെയ്തു. നിയമസഭയിലും പാര്ലമെന്റിലും തുടര്ച്ചയായി സംവാദങ്ങള് തടസ്സപ്പെടുന്നതിലും ചര്ച്ചകളുടെ നിലവാരം തകരുന്നതിലും അദ്ദേഹം ആശങ്ക പ്രകടിപ്പിച്ചു.
ഹൈദരാബാദില് നിന്നുള്ള മുന് പാര്ലമെന്റ് അംഗവും വിദ്യാഭ്യാസ പ്രവര്ത്തകനുമായ നൂകല നരോത്തം റെഡ്ഡിയുടെ ജന്മ ശതാബ്ദി ആഘോഷത്തില് പങ്കെടുക്കുകയായിരുന്നു അദ്ദേഹം. ചില സംസ്ഥാനങ്ങളിലെ നിയമസഭകളില് അടുത്തിടെ നടന്ന സംഭവങ്ങള് നിരാശാജനകമാണെന്ന് അദ്ദേഹം പറഞ്ഞു. തടസ്സപ്പെടുത്തുക എന്നാല് ചര്ച്ചയെ വഴിതെറ്റിക്കുകയും ജനാധിപത്യത്തെയും രാജ്യത്തെയും വഴിതെറ്റിക്കുകയും ആണെന്ന് അദ്ദേഹം അഭിപ്രായപ്പെട്ടു. ഈ പ്രവണത തുടരുകയാണെങ്കില് ജനങ്ങള് നിരാശരാകും എന്ന് അദ്ദേഹം മുന്നറിയിപ്പ് നല്കി.
പാര്ലമെന്റിന്റെയും നിയമസഭകളുടെയും നടത്തിപ്പ്, ചര്ച്ച(Discussion ),സംവാദം (Debate ),തീരുമാനം(Decision ) എന്നീ 3-D കളെ ആശ്രയിച്ച് ഉള്ളതാവണം. ഒരു ഘട്ടത്തിലും സഭകള് തടസ്സപ്പെടുത്തലിന്റെ വേദികള് ആവരുത് . സഭ തടസ്സപ്പെടുത്തുന്നത് പൊതുജന താല്പര്യത്തെ ഹനിക്കുക മാത്രമാണ് ചെയ്യുന്നതെന്നും അദ്ദേഹം പറഞ്ഞു.
പാര്ലമെന്റില് ശ്രീ നരോത്തം റെഡ്ഡി ഭാഗമായ ചര്ച്ചകളില് മാതൃകാപരമായ ഗുണമേന്മ പ്രതിഫലിച്ചിരുന്നതായി അദ്ദേഹം പറഞ്ഞു. സാമാജികരുടെ പ്രവര്ത്തികള് ജനങ്ങളുടെ അഭിലാഷങ്ങള് പ്രതിഫലിക്കുന്നത് ആയിരിക്കണം. ഇതിനായി സഭകളില് കൂടുതല് ക്രിയാത്മകവും അര്ത്ഥവത്തുമായി സമയത്തെ ഉപയോഗപ്പെടുത്താന് അദ്ദേഹം ആഹ്വാനം ചെയ്തു.
സഭകളില് പാര്ലമെന്റ് അംഗങ്ങളുടെയും നിയമസഭ സാമാജികരുടെയും ഹാജര്നില കുറയുന്നതില് ആശങ്ക പ്രകടിപ്പിച്ച അദ്ദേഹം, അവര് അതത് സഭകളില് കൃത്യമായി പങ്കെടുക്കണമെന്നും ചര്ച്ചകളില് അര്ത്ഥവത്തായ സംഭാവനകള് നല്കണമെന്നും ആവശ്യപ്പെട്ടു. മഹാന്മാരായ പാര്ലമെന്റെറിയന്മാരുടെ സംവാദങ്ങളും ഭരണഘടന അസംബ്ലിയിലെ സംവാദങ്ങളും അവര് പഠിക്കണമെന്നും അദ്ദേഹം ആവശ്യപ്പെട്ടു.
അംഗങ്ങളുടെ വിമര്ശനം ക്രിയാത്മകമായിരിക്കണം എന്നും മറ്റുള്ളവര് ക്കെതിരായ വ്യക്തിപരമായ ആക്രമണങ്ങളില് ഏര്പ്പെടരുതെന്നും ഉപ രാഷ്ട്രപതി പറഞ്ഞു.കഴിവ് (caliber), പെരുമാറ്റം(conduct), ശേഷി (capacity), സ്വഭാവം (character ) എന്നീ നാല് C -കള് കൈവശമുള്ള പ്രതിനിധികളെ തെരഞ്ഞെടുക്കാന് നായിഡു ജനങ്ങളോട് അഭ്യര്ത്ഥിച്ചു.
പൊതുജീവിതത്തില് ധാര്മികമൂല്യങ്ങള്, ദേശസ്നേഹം, സത്യസന്ധത എന്നിവ ഉള്ചേര്ക്കുന്നതിന് വിദ്യാഭ്യാസത്തിന്റെ പ്രാധാന്യം ഊന്നി പറഞ്ഞനായിഡു, വിദ്യാഭ്യാസം സമഗ്ര വ്യക്തികളെ സൃഷ്ടിക്കണമെന്നും പറഞ്ഞു. ഇന്ത്യയിലെ ജനസംഖ്യ വിഹിതം ചൂണ്ടിക്കാട്ടിയ അദ്ദേഹം, മറ്റൊരു രാജ്യത്തിനും ഇത്തരത്തിലുള്ള നേട്ടമില്ലെന്നും രാജ്യത്തിന്റെ പുരോഗതിക്കായി അത് പൂര്ണമായും പ്രയോജനപ്പെടുത്തേണ്ടതുണ്ട് എന്നും അഭിപ്രായപ്പെട്ടു. ഈ പശ്ചാത്തലത്തില് ഇരുപത്തിയൊന്നാം നൂറ്റാണ്ടിലെ ആവശ്യങ്ങള്ക്കനുസൃതമായി യുവാക്കളെ വാര്ത്തെടുക്കാന് അദ്ദേഹം ആഹ്വാനം ചെയ്തു. ഏറ്റവും നൂതനമായ സാങ്കേതികവിദ്യകള് ഉപയോഗിച്ച് സ്വയം നവീകരിക്കാന് അദ്ദേഹം വിദ്യാര്ഥികളെ ഉപദേശിച്ചു.
ഇന്ത്യയുടെ മഹത്തായ വിദ്യാഭ്യാസ പാരമ്പര്യത്തെ അനുസ്മരിച്ച ഉപ രാഷ്ട്രപതി നളന്ദ, തക്ഷശില തുടങ്ങിയ പ്രശസ്ത സ്ഥാപനങ്ങളില് വിദേശ വിദ്യാര്ഥികള് പഠിക്കാന് വന്നിരുന്നതായും പറഞ്ഞു. ആ പഴയ പ്രതാപം വീണ്ടെടുക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.
മാതൃഭാഷയുടെ പ്രാധാന്യം ചൂണ്ടിക്കാട്ടിയ അദ്ദേഹം, തെരഞ്ഞെടുത്ത ജനങ്ങള്, ആ ജനപ്രതിനിധി എന്താണ് പറയുന്നതെന്ന് അറിയണം എന്നതിനാല് അംഗങ്ങള് കഴിയുന്നത്ര അവരുടെ മാതൃഭാഷയില് സംസാരിക്കാന് ശ്രമിക്കണമെന്നും ആവശ്യപ്പെട്ടു. മാതൃഭാഷയ്ക്ക് മുന്ഗണന നല്കിക്കൊണ്ട് രാജ്യസഭ ഇപ്പോള് 22 ഭാഷകളില് സംസാരിക്കാന് അവസരം നല്കിയിട്ടുണ്ടെന്നും ഇതിനായി മതിയായ സൗകര്യങ്ങള് ഒരുക്കിയിട്ടുണ്ടെന്നും അദ്ദേഹം പറഞ്ഞു
