കണ്ണൂർ: ചെറുപുഴയിൽ അയൽവാസിയുടെ വെടിയേറ്റ് ഒരാൾ മരിച്ചു. അയൽവാസികൾ തമ്മിലുള്ള തർക്കത്തിനിടെയാണ് വെടിവെപ്പുണ്ടായത്. കാനംവയൽ ചേനാട്ട് കൊല്ലിയിലെ കൊങ്ങോലയിൽ സെബാസ്റ്റ്യനാ(ബേബി)ണ് മരിച്ചത്. അയൽവാസി ടോമിയുടെ വെടിയേറ്റാണ് മരണം.
ഇന്ന് രാവിലെ എട്ട് മണിക്കാണ് സംഭവം. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പ്രതി ഒളിവിലാണെന്ന് പോലീസ് അറിയിച്ചു. ടോമി മദ്യപിച്ച് ബഹളമുണ്ടാക്കുന്നത് പതിവാണെന്നും ഇത് സെബാസ്റ്റ്യൻ ചോദ്യം ചെയ്തതാണ് തർക്കത്തിന് കാരണമായതെന്നും പോലീസ് പറഞ്ഞു.
പ്രദേശത്ത് കാട്ടുപന്നികളുടെ ശല്യം രൂക്ഷമായതിനാൽ ഇവിടെ കള്ളത്തോക്കുകൾ വ്യാപകമാണ്. ടോമിയുടെ കൈയിൽ ഉണ്ടായിരുന്നതും ഇത്തരത്തിലുള്ള തോക്കാണെന്ന് കരുതുന്നു.
