തിരുവനന്തപുരം: കഴക്കൂട്ടം നിയോജകമണ്ഡലത്തിലെ എന്‍ഡിഎ സ്ഥാനാര്‍ഥി ശോഭാസുരേന്ദ്രന്‍ നാമനിര്‍ദ്ദേശ പത്രിക സമര്‍പ്പിച്ചു. ഉച്ചയ്‌ക്ക് രണ്ടിനും 2.17 നും ഇടയ്‌ക്ക് പോത്തന്‍കോട് ബ്ലോക്ക് പഞ്ചായത്ത് ഓഫീസിലെത്തി ഉപവരണാധികാരി ശംഭു.എസിന് മുമ്പാകെയാണ് പത്രിക സമര്‍പ്പിച്ചത്.
ചെമ്പഴന്തി ഗുരുകുലത്തിലും അയ്യങ്കാളി നഗറിലെ അയ്യങ്കാളി പ്രതിമയിലും അണിയൂരിലെ ചട്ടമ്പിസ്വാമി ശ്രീനാരായണഗുരു സംഗമസ്മൃതി മന്ദിരത്തിലും പുഷ്പാര്‍ച്ചന നടത്തിയ ശേഷം കരിക്കകം ചാമുണ്ഡി ക്ഷേത്രം, അണിയൂര്‍ ക്ഷേത്രം, ഇളംകുളം മഹാദേവക്ഷേത്രം എന്നിവിടങ്ങളില്‍ ദര്‍ശനവും നടത്തിയ ശേഷമാണ് ശോഭാ സുരേന്ദ്രന്‍ നാമനിര്‍ദ്ദേശ പത്രിക സമര്‍പ്പിച്ചത്.
കാര്യവട്ടം ശ്രീ ധര്‍മ്മശാസ്താ ക്ഷേത്രത്തിലെ മാതൃസമിതി പ്രവര്‍ത്തകരാണ് കെട്ടിവയ്ക്കാനുള്ള തുക നല്‍കിയത്. ബിജെപി മണ്ഡലം പ്രസിഡന്റ് ആര്‍.എസ്. രാജീവ്, മണ്ഡലം ജനറല്‍ സെക്രട്ടറി ബാലു ജി. നായര്‍, സംസ്ഥാന സമിതി അംഗങ്ങളായ പോങ്ങുംമൂട് വിക്രമന്‍, ചെറുവയ്‌ക്കല്‍ ജയന്‍, ജില്ലാ സെക്രട്ടറി കഴക്കൂട്ടം അനില്‍, മഹിളാമോര്‍ച്ച നേതാക്കള്‍ തുടങ്ങിയവര്‍ ശോഭാ സുരേന്ദ്രനോടൊപ്പം പത്രികാ സമര്‍പ്പണത്തിനെത്തിയിരുന്നു.
