വെച്ചൂര്: വെച്ചൂര് ഗ്രാമപഞ്ചായത്തിലെ നാലാം വാര്ഡില് താറാവുകള്ക്ക് പക്ഷിപ്പനി സ്ഥിരീകരിച്ചതിനെത്തുടര്ന്ന് 9205 താറാവുകളെ കൊന്നു. 6305 താറാവുകളെ വെള്ളിയാഴ്ചയും 2900 താറാവുകളെ ശനിയാഴ്ചയുമാണ് കൊന്നത്.
ജില്ലാ കളക്ടര് എം. അഞ്ജനയുടെ അദ്ധ്യക്ഷതയില് ചേര്ന്ന അടിയന്തരയോഗത്തിന്റെ തീരുമാനമനുസരിച്ച് നിയോഗിക്കപ്പെട്ട മൂന്ന് ദ്രുതകര്മ്മ സേനകളാണ് രോഗം സ്ഥിരീകരിച്ച സ്ഥലത്തെയും ഒരു കിലോമീറ്റര് ചുറ്റളവിലുള്ള പ്രദേശത്തെയും കൊന്ന് മറവു ചെയ്തു.
ഇവിടുത്തെ ഫാമില് താറാവുകള് തുടര്ച്ചയായി ചാകുന്നതായി വിവരം ലഭിച്ചതിനെത്തുടര്ന്ന് ജില്ലാ മൃഗസംരക്ഷണ വകുപ്പ് ഉദ്യോഗസ്ഥര് സാമ്പിളുകള് പരിശോധനയ്ക്ക് അയക്കുകയായിരുന്നു.
ഭോപ്പാലിലെ നാഷണല് ഇന്സ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമല് ഡിസീസസില്നിന്ന് പക്ഷിപ്പനി സ്ഥിരീകരിച്ചുള്ള അറിയിപ്പ് വ്യാഴാഴ്ച്ച വൈകുന്നേരമാണ് ലഭിച്ചത്. ഇതേത്തുടര്ന്ന് പക്ഷികളെ കൊന്നൊടുക്കുന്നതിന് അടിയന്തര നടപടികള് ആരംഭിക്കുകയായിരുന്നു.
ജില്ലാ മൃഗസംരക്ഷണ ഓഫീസര് ഡോ. ഷാജി പണിക്കശ്ശേരി, പക്ഷിപ്പനി പ്രതിരോധ പ്രവര്ത്തനങ്ങളുടെ നോഡല് ഓഫീസര് ഡോ. സജീവ്കുമാര്, ടെക്നിക്കല് അസിസ്റ്റന്റ് ഡോ. മുഹമ്മദ് ഫിറോസ് എന്നിവര് നടപടികള്ക്ക് നേതൃത്വം നല്കി.
നേരത്തെ നീണ്ടൂരിലും പക്ഷിപ്പനി സ്ഥീരികരിക്കുകയും താറാവുകളെയും ഒരു കിലോമീറ്റര് ചുറ്റളവില് ഉള്ള കോഴികള് ഉള്പ്പെടെയുള്ള വളര്ത്തുപക്ഷികളെയും കൊന്നൊടുക്കിയിരുന്നു. നീണ്ടൂരിലെ താറാവു ഫാമിലായിരുന്നു അന്ന് രോഗം ആദ്യം സ്ഥിരീകരിച്ചത്.
ദേശാടനപക്ഷികള് ഉള്പ്പെടെയുള്ളവയെ നിരീക്ഷിക്കാനും നിര്ദ്ദേശം നല്കിയിരുന്നു. ഇതിനിടെയാണ് വെച്ചൂരില് പക്ഷിപ്പനി സ്ഥിരീകരിച്ചത്.
