തിരുവനന്തപുരം: മാതൃഭൂമി നല്‍കിയ വ്യാജവാര്‍ത്തക്കെതിരെ പ്രതികരണവുമായി ബിജെപി നേതാവ് ശോഭാ സുരേന്ദ്രന്‍. മാതൃഭൂമി ദിനപത്രത്തില്‍ പറയാത്ത കാര്യങ്ങളാണ് എന്റെ പ്രസ്താവനയായി വന്നിരിക്കുന്നത്. മാതൃഭൂമിയുടെ ഭാഗത്തുനിന്ന് ഇത്തരം ഒരു കാര്യം ഉണ്ടാവാന്‍ പാടില്ലാത്തതായിരുന്നുവെന്നും ശോഭാ സുരേന്ദ്രന്‍ പറഞ്ഞു.
ശോഭാ സുരേന്ദ്രന്റെ ഫേസ്ബുക്ക് പോസ്റ്റിന്റെ പൂര്‍ണരൂപം:
മാതൃഭൂമി വാര്‍ത്ത ഞാന്‍ പറയാത്ത പ്രസ്താവന
പൊതുപ്രവര്‍ത്തനരംഗത്തെ ഓരോ ഘട്ടത്തിലും മാധ്യമ പ്രവര്‍ത്തകരോടും ജനങ്ങളോടും നിരന്തരം സംവദിച്ചും ഇടപെട്ടുമാണ് രാഷ്‌ട്രീയപ്രവര്‍ത്തനം നടത്തിയിട്ടുള്ളത്. ഇന്നലെ നൂറുകണക്കിന് മാധ്യമപ്രവര്‍ത്തകരുടെ മുന്‍പില്‍ മറുപടി പറയാന്‍ ഞാനുണ്ടായിരുന്നില്ലേ? എന്നാല്‍, ഇന്നത്തെ മാതൃഭൂമി ദിനപത്രത്തില്‍ ഞാന്‍ പറയാത്ത കാര്യങ്ങളാണ് എന്റെ പ്രസ്താവനയായി വന്നിരിക്കുന്നത്.
സ്വാതന്ത്ര്യസമര കാലഘട്ടം മുതല്‍ ജനപക്ഷമാധ്യമ ധാര്‍മികത ഉയര്‍ത്തിപ്പിടിച്ചു പ്രവര്‍ത്തിക്കുകയും സ്ത്രീ പക്ഷത്തു നില്‍ക്കുകയും അവരുടെ പോരാട്ടങ്ങളുമായി ഐക്യപ്പെടുകയും ചെയ്യുന്ന പത്രമാണ് മാതൃഭൂമി. ആ പത്രത്തിന്റെ ഭാഗത്തുനിന്ന് ഇത്തരം ഒരു കാര്യം ഉണ്ടാവാന്‍ പാടില്ലാത്തതായിരുന്നു.
