കൊല്ലം: ഭാരതീയ ജനതാ കര്ഷക മോര്ച്ച ജില്ലാ അദ്ധ്യക്ഷന് ആയൂര് മുരളി നയിക്കുന്ന കര്ഷക മുന്നേറ്റയാത്ര ഇന്ന് കൊല്ലം നഗരത്തില് സമാപിക്കും. ഇരവിപുരം മണ്ഡലത്തിന്റെ സ്വീകരണ പരിപാടികള്ക്ക് ഉമയനല്ലൂരില് ആരംഭം കുറിക്കും.
തുടര്ന്ന് ബൈക്ക് റാലിയോടെ മയ്യനാട് ജംഗ്ഷന്, തിരുമുക്ക്, പോളയത്തോട്, രണ്ടാംകുറ്റി തുടങ്ങിയ സ്ഥലങ്ങളില് സ്വീകരണം നല്കും. വൈകിട്ട് 7ന് ചിന്നക്കടയില് സമാപന സമ്മേളനം കര്ഷകമോര്ച്ച സംസ്ഥാന അധ്യക്ഷന് അഡ്വ. ജയസൂര്യന് ഉദ്ഘാടനം ചെയ്യും. ബിജെപി ജില്ലാ അദ്ധ്യക്ഷന് ബി.ബി. ഗോപകുമാര് പങ്കെടുക്കും.
കര്ഷക മുന്നേറ്റ യാത്രയ്ക്ക് പരവൂരില് സ്വീകരണം നല്കി. ജാഥയുടെ ഭാഗമായി നടന്ന പൊതുസമ്മേളനത്തില് കര്ഷക മോര്ച്ച പരവൂര് മുന്സിപ്പല് പ്രസിഡന്റ് സുരേഷ് ബാബു അദ്ധ്യക്ഷനായി.
ജനറല് സെക്രട്ടറി ശ്രീലാല്.ജി. സ്വാഗതം ആശംസിച്ചു. ജാഥയില് പങ്കെടുത്ത സുരേഷ് ബാബു, വിജയകുമാരനാശാന്, ജാഥാ ക്യാപ്റ്റന് ആയൂര് മുരളി, കര്ഷക മോര്ച്ച ജില്ലാ ഉപാദ്ധ്യക്ഷന് കൃഷ്ണകുമാര്, പ്രദീപ് കുമാര് തുടങ്ങിയവര് സംസാരിച്ചു.
