തൊടുപുഴ: നഗരത്തിന് സമീപം പ്രഭാത സവാരിക്കിടെ വീട്ടമ്മയെ ദേഹോപ്രദ്രവം ഏല്‍പ്പിക്കാന്‍ സാമൂഹ്യ വിരുദ്ധന്റെ ശ്രമം. തൊടുപുഴയിലെ ഒരു നഗരസഭ കൗണ്‍സിലര്‍ നല്‍കിയ പരാതിയില്‍ പോലീസ് അന്വേഷണം ആരംഭിച്ചു.
കാഞ്ഞിരമറ്റം-മങ്ങാട്ടുക്കവല ബൈപ്പാസ് റോഡില്‍ റൗണ്ട് ജങ്ഷന് സമീപം ഇന്നലെ രാവിലെ ആറ് മണിയോടെയാണ് സംഭവം. നടക്കുന്നതിനിടെ പിന്നാലെ ബൈക്കിലെത്തിയ മാസ്‌ക്ക് ധരിച്ച യുവാവ് വീട്ടമ്മയുടെ ദേഹത്ത് കടന്ന് പിടിക്കാന്‍ ശ്രമിക്കുകയായിരുന്നു. ബഹളം വെച്ചതോടെ ഇയാള്‍ കടന്ന് കളഞ്ഞു. പിന്നാലെ അല്‍പം കഴിഞ്ഞ വീണ്ടുമെത്തി കുറച്ച് മുമ്പില്‍ ഭര്‍ത്താവിനൊപ്പം നടക്കുകയായിരുന്ന വീട്ടമ്മയേയും ഉപദ്രവിക്കാന്‍ ശ്രമിച്ചു. ഇവര്‍ ബഹളം വെച്ചതോടെ യുവാവ് കടന്ന് കളഞ്ഞു.
സിസിടിവി ദൃശ്യങ്ങള്‍ ശേഖരിച്ച് അന്വേഷണം നടത്തുന്നതായും മേഖലയില്‍ പുലര്‍ച്ചെ സമയങ്ങളിലടക്കം പെട്രോളിങ് ശക്തമാക്കുമെന്നും തൊടുപുഴ എസ്‌ഐ ബൈജു പി. ബാബു പറഞ്ഞു. അതേ സമയം സ്ഥലത്ത് വഴി വിളക്കുകള്‍ ഇല്ലാത്തത് മുതലാക്കിയാണ് ഇത്തരക്കാര്‍ പ്രഭാതസവാരിക്കാരായ വനിതകളെ ലക്ഷ്യം വെച്ചെത്തുന്നതെന്ന പരാതിയുമുണ്ട്.
