ലണ്ടന്: ലെസ്റ്റര് സിറ്റിയെ തോല്പ്പിച്ച് ലിവര്പൂള് പ്രീമിയര് ലീഗില് ഒന്നാം സ്ഥാനത്തുള്ള ടോട്ടനത്തിനൊപ്പം എത്തി. മറ്റൊരു മത്സരത്തില് പത്തംഗ ആഴ്സണല് ലീഡ്സ് യുണൈറ്റഡിനെ ഗോള് രഹിത സമനിലയില് പിടിച്ചുനിര്ത്തി.
നിലിവലെ ചാമ്പ്യന്മാരായ ലിവര്പൂള് മടക്കമില്ലാത്ത മൂന്ന് ഗോളുകള്ക്കാണ് ലെസ്റ്റര് സിറ്റയെ തോല്പ്പിച്ചത്. സ്വന്തം തട്ടകമായ ആന്ഫീല്ഡില് ലിവര്പൂള് തോല്വിയറിയാത്ത 64-ാം മത്സരമാണിത്.
21-ാം മിനിറ്റില് ഇവാന്സിന്റെ സെല്ഫ് ഗോളില് ലിവര്പൂള് മുന്നിലെത്തി. ഡിയോഗോ ജോറ്റ 41-ാം മിനിറ്റില് ലിവര്പൂളിന്റെ ലീഡ് 2-0 ആക്കി. 86-ാം മിനിറ്റില് റോബര്ട്ടോ ഫിര്മിനോയും ഗോള് അടിച്ചതോടെ ലിവര്പൂള് 3-0ന് ജയിച്ചുകയറി. ഈ വിജയത്തോടെ ലിവര്പൂള് 9 മത്സരങ്ങളില് 20 പോയിന്റുമായി ഒന്നാം സ്ഥാനത്തുള്ള ടോട്ടനത്തിനൊപ്പം എത്തി.
മറ്റൊരു മത്സരത്തില് എവര്ട്ടണ് രണ്ടിനെതിരെ മൂന്ന് ഗോളുകള്ക്ക് ഫുല്ഹാമിനെ പരാജയപ്പെടുത്തി. വെസ്റ്റ് ഹാം യുണൈറ്റഡ് ഏകപക്ഷീയമായ ഒരു ഗോളിന് ഷെഫീല്ഡ് യുണൈറ്റഡിനെ കീഴടക്കി.
