ന്യൂദല്ഹി : സമാധാന ചര്ച്ചകളും അക്രമവും ഒരുമിച്ച് പോകില്ല. ഐക്യരാഷ്ട്ര സുരക്ഷാ കൗണ്സില് യോഗത്തില് പാക്കിസ്ഥാനെതിരെ രൂക്ഷ വിമര്ശനവുമായി ഇന്ത്യ. ഭീകരരുടെ സുരക്ഷാ കേന്ദ്രവും സ്വര്ഗ്ഗവുമാണ് ഇത്. ഭീകരത ഇല്ലാതാക്കാനുള്ള പ്രായോഗിക പദ്ധതികള് എന്ന വിഷയത്തില് സുരക്ഷാ കൗണ്സില് യോഗത്തില് ഇന്ത്യന് പ്രതിനിധി ടി.എസ്. ഗുരുമൂര്ത്തി സംസാരിക്കവേയാണ് ഇത്തരത്തില് പാക്കിസ്ഥാനെതിരെ രൂക്ഷ വിമര്ശനം ഉയര്ത്തിയത്.
അഫ്ഗാനില് ഭീകരതയ്ക്ക് പിന്തുണ നല്കുന്ന പാക്കിസ്ഥാനേയും പാക് പിന്തുണയോടെ ഭീകരാക്രമണങ്ങള് നടത്തുന്ന സംഘടനകളേയും യോഗത്തില് ഇന്ത്യ അപലപിച്ചു. അഫ്ഗാനില് നടന്ന സമാധാന ചര്ച്ചയിലെ തീരുമാനങ്ങള് നടപ്പിലാക്കാന് സുരക്ഷാ കൗണ്സില് എന്ത് നടപടിയാണെടുത്തത്.
ഒരു വശത്ത് സമാധാനവുമായി വന്ശക്തികള് മുന്നോട്ട് പോകുന്നു. മറുവശത്ത് അഫ്ഗാനിലും ലോകത്തിന്റെ പലഭാഗത്തും സ്ത്രീകളും കുട്ടികളുമടക്കം നിരപരാധികള് മരിച്ചുവീഴുകയാണ്. ഇത്തരം സംഭവങ്ങളില് ഉടന് ഇടപെടാനും നടപടി സ്വീകരിക്കുകയുമാണ് വേണ്ടത്. സുരക്ഷാ കൗണ്സിലിന്റെ പ്രവര്ത്തനങ്ങള് ശക്തമാക്കണം. ആഗോള തലത്തില് ഭീകര പ്രവര്ത്തനങ്ങള്ക്കും, ഇതിന് പ്രോത്സാഹനം നല്കുന്ന രാജ്യങ്ങള്ക്കുമെതിരെ സുരക്ഷാ കൗണ്സില് കര്ശ്ശന നടപടി തന്നെ കൈക്കൊള്ളണം. ഭീകര സംഘടനകളേയും അവരുടെ താവളങ്ങളേയും തകര്ക്കാതെ സമാധാന ശ്രമങ്ങള്ക്ക് പോകുന്നതില് അര്ത്ഥമില്ലെന്നും ഗുരുമൂര്ത്തി കൂട്ടിച്ചേര്ത്തു.
